ସମ୍ବଲପୁର, ୧୩ ଜୁନ୍ (ହି.ସ.)- ସପ୍ତମ କ୍ଷୁଦ୍ର ଜଳସେଚନ ଗଣନା ଅବସରରେ ଦ୍ଵିତୀୟ ଜଳାଶୟ ଗଣନା ଏବଂ ପ୍ରଥମ ଝରଣା ଗଣନା ପାଇଁ ଆଜି ଜିଲ୍ଲାପାଳଙ୍କ ଅଧ୍ୟକ୍ଷତାରେ ଜିଲ୍ଲାସ୍ତରୀୟ ଉପ କମିଟି ବୈଠକ ଅନୁଷ୍ଠିତ ହୋଇଯାଇଛି l ସମ୍ବଲପୁର ଜିଲ୍ଲାର ବିଭିନ୍ନ ଗ୍ରାମାଞ୍ଚଳରେ ଥିବା ମୋଟ ୧୩୧୯ ଗ୍ରାମରେ ଉଭୟ କ୍ଷୁଦ୍ର ଜଳସେଚନ ଗଣନା ଓ ଜଳାଶୟ ଗଣନା ହେବାକୁ ଥିବାବେଳେ ସହରାଞ୍ଚଳରେ କେବଳ ଜଳାଶୟ ଗଣନା କରାଯିବ l ଏଥି ସହିତ ଜିଲ୍ଲାରେ ଥିବା ସମସ୍ତ ବୃହତ ଓ ମଧ୍ୟମ ଜଳସେଚନ ପ୍ରକଳ୍ପ ଏବଂ ସମସ୍ତ ଝରଣା ଏହି ସର୍ଭେରେ ଅନ୍ତର୍ଭୁକ୍ତ କରାଯିବ l ଏହି ସର୍ଭେ ପାଇଁ ରାଜ୍ୟ ସ୍ତରରେ ଅର୍ଥନୀତି ଓ ପରିସଂଖ୍ୟାନ ନିର୍ଦ୍ଦେଶାଳୟ ଏବଂ ଜିଲ୍ଲା ସ୍ତରରେ ଜିଲା ପରିସଂଖ୍ୟାନ କାର୍ଯ୍ୟାଳୟ ନୋଡାଲ ସଂସ୍ଥା ଅଟନ୍ତି l ଏହି ଗଣନା କାର୍ଯ୍ୟ ଅଦ୍ୟମାନ ପରିସଂଖ୍ୟାନ କର୍ମଚାରୀ ଏବଂ ସ୍ଥାନୀୟ ଯୁବକ ମାନଙ୍କ ଦ୍ଵାରା ସମ୍ପନ୍ନ କରିବାପାଇଁ ରାଜ୍ୟ ସ୍ତରରେ ସ୍ଥିର କରାଯାଇଛି l ଏଥିପାଇଁ ଜିଲ୍ଲା ପରିସଂଖ୍ୟାନ କାର୍ଯ୍ୟାଳୟ ୩୨ ଜଣ ସ୍ଥାନୀୟ ଯୁବକ ନିୟୋଜନ ପାଇଁ ବିଜ୍ଞାପନ ଜାରି କରିସାରିଛି ଯାହାର ଆବେଦନ ଶେଷ ତାରିଖ ଜୁନ ୨୦ ତାରିଖ ରଖାଯାଇଛି l ଜିଲ୍ଲାରେ ଗଣନା କାର୍ଯ୍ୟ ଜୁଲାଇ ପ୍ରଥମ ସପ୍ତାହରୁ ଆରମ୍ଭ କରି ୬ ମାସ ମଧ୍ୟରେ ଗଣନା କାର୍ଯ୍ୟ ସାରିବାକୁ ବୈଠକରେ ସ୍ଥିର କରାଯାଇଥିଲା l ଏଥିସହିତ ଜିଲ୍ଲାପାଳ ତଥ୍ୟର ଗୁଣବତ୍ତା ଉନ୍ନତ କରିବା ପାଇଁ ଉପସ୍ଥିତ ସମସ୍ତ ଅଧିକାରୀଙ୍କୁ ଆହ୍ବାନ କରିଥିଲେ l

କମିଟିର ଅନ୍ୟ ସଦସ୍ୟ ତଥା ଜଳସମ୍ପଦ ବିଭାଗ ଏବଂ କୃଷି ଓ କୃଷକ ସଶକ୍ତିକରଣ ବିଭାଗ ର ଜିଲ୍ଲାସ୍ତରୀୟ ଅଧିକାରୀ ମାନେ ବୈଠକରେ ଉପସ୍ଥିତ ଥିଲେ l ଏହି ବୈଠକକୁ ସମ୍ବଲପୁର ଡିପିଏମ୍ଓ ଉପ ନିର୍ଦ୍ଦେଶକ ପ୍ରକାଶ କୁମାର ଦେଓ ପରିଚାଳନା କରିଥିଲେ l

ହିନ୍ଦୁସ୍ଥାନ ସମାଚାର / ଶୈଳେଶ