ଭଦ୍ରକ, ୨୬ ଜୁଲାଇ (ହି.ସ.) - ଭଦ୍ରକ ଜିଲା ତିହିଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଇନ୍‌ଡୋର (ଅର୍ନ୍ତବିଭାଗ) ଛାତ ବିପଦ ସଂକୁଳ ଅବସ୍ଥାରେ ରହିଛି । ଛାତର ବିଭିନ୍ନ ସ୍ଥାନରୁ ପାଣି ଗଳିବା ସହିତ ତଡ଼ା ତଡ଼ା ହୋଇ କଂକ୍ରିଟ୍ ଖସୁଛି । ସ୍ୱାସ୍ଥ୍ୟକେନ୍ଦ୍ରରେ ଥିବା ପୁରୁଷ ଓ ମହିଳା ୱାର୍ଡ଼ର ଥିବା ରୋଗୀମାନେ ଆତଂକିତ ହୋଇ ପଡ଼ିଛନ୍ତି । କେତେବେଳେ ଯେ ରୋଗୀମାନଙ୍କ ଉପରେ କଂକ୍ରିଟ୍ ଖସିବ ସେକଥା କହି ହେବ ନାହିଁ । ତିହିଡ଼ି ସ୍ୱାସ୍ଥ୍ୟକେନ୍ଦ୍ରକୁ ତିହିଡ଼ି ବ୍ଲକର ଚାନ୍ଦବାଲି, ବାସୁଦେବପୁର, ଧାମଗର ନିର୍ବଚନ ମଣ୍ଡଳୀର ହଜାର ହଜାର ରୋଗୀ ଚିକିତ୍ସା ପାଇଁ ଆସିଥାନ୍ତି । ଜରୁରୀ କାଳୀନ ରୋଗୀମାନଙ୍କୁ ଅର୍ନ୍ତବିଭାଗରେ ରଖାଯାଇ ଚିକିତ୍ସା କରାଯାଇଥାଏ । ଅର୍ନ୍ତବିଭାଗ ୨୦୦୩ ମସିହାରୁ ନିର୍ମାଣ ହୋଇଛି । କିଛିଦିନ ପୂର୍ବେ କେତେକ ପାଣି ଗଳୁଥିବା ସ୍ଥାନରେ ମରାମତି କରାଯାଇଥିଲା । ମାତ୍ର ଅର୍ନ୍ତବିଭାଗରେ ଥିବା ମହିଳା ଓ ପୁରୁଷ ୱାର୍ଡ଼କୁ ମରାମତି କରାଯାଇ ନଥିଲା । ଯାହାଫଳରେ ଏବେ ୨ଟି ୱାର୍ଡ଼ର ଛାତରୁ ପାଣି ଗଳିବା ସହିତ କଂକ୍ରିଟ୍ ମଧ୍ୟ ଖସୁଛି । ଯେଉଁଥିପାଇଁ ରୋଗୀମାନେ ନିଜକୁ ସୁରକ୍ଷିତ ମଣି ପାରୁନାହାନ୍ତି । ଗତ ମଇ ୨ ତାରିଖରେ ରୋଗୀ କଲ୍ୟାଣ ସମିତି ବୈଠକରେ ଛାତରୁ ପାଣି ଗଳିବାକୁ ନେଇ ଆଲୋଚନା କରାଯାଇଥିଲା । ଏନେଇ ପଦକ୍ଷେପ ନିଆଯିବ ବୋଲି କୁହାଯାଇଥିଲା । ମାତ୍ର ଅଦ୍ୟାବଧି କୌଣସି ମରାମତି କରାଯିବା ଉପରେ ପଦକ୍ଷେପ ନିଆଯାଇ ନାହିଁ । ସ୍ୱାସ୍ଥ୍ୟକେନ୍ଦ୍ରର ଅତ୍ୟାଧୁନିକ ଗୃହ ନିର୍ମାଣ ପାଇଁ ୧୭କୋଟି ଟଙ୍କା ମଂଜୁର ହୋଇ ରହିଛି । ମାତ୍ର ଏହି ଟଙ୍କା କାର୍ଯ୍ୟରେ ଲାଗି ପାରୁନାହିଁ । ରାଜନୈତିକ ଇଚ୍ଛାଶକ୍ତିର ଅଭାବ ପାଇଁ ଗୃହ ନିର୍ମାଣରେ ବିଳମ୍ବ ହେଉଥିବା ସାଧାରଣରେ ଆଲୋଚନା କରାଯାଉଛି । ଫଳରେ ସ୍ଥାନୀୟ ଅଂଚଳର ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ତୁରନ୍ତ ଅର୍ନ୍ତବିଭାଗ ଛାତକୁ ମରାମତି କରାଯାଇ ରୋଗୀମାନଙ୍କୁ ବିପଦମୁକ୍ତ କରାଯିବା ସହ ନୂତନ ଅତ୍ୟାଧୁନିକ ଗୃହ ନିର୍ମାଣ ପାଇଁ ସାଧାରଣରେ ଦାବି କରାଯାଇଛି ।

ହିନ୍ଦୁସ୍ଥାନ ସମାଚାର / ପ୍ରମୋଦ କୁମାର ରାୟ