ଭାରତୀୟ ରେଳ ମଜଦୁର ସଂଘର ରାଷ୍ଟ୍ରବ୍ୟାପୀ ପ୍ରତିବାଦ ସପ୍ତାହ ୨୮ ଅକ୍ଟୋବର ପର୍ଯ୍ୟନ୍ତ
ଦୀପାବଳି ପୂର୍ବରୁ ୨୦୨୫-୨୬ ବର୍ଷର ବୋନସ୍ ବକେୟା ପାର୍ଥକ୍ୟ ରାଶି ପ୍ରଦାନ ଦାବି
ଭୁବନେଶ୍ୱର, ୨୫ ଅକ୍ଟୋବର (ହି.ସ.)। ରେଳ କର୍ମଚାରୀଙ୍କ ଉତ୍ପାଦକତା ସହ ଜଡ଼ିତ ବୋନସ୍ (ପିଏଲ୍ବି) ଗଣନା ସୀମାକୁ ବର୍ତ୍ତମାନର ମାସିକ ୭,୦୦୦ ଟଙ୍କାରୁ ୧୮,୦୦୦ ଟଙ୍କାକୁ ବୃଦ୍ଧି କରିବା ଦାବିରେ ଭାରତୀୟ ରେଳ ମଜଦୁର ସଂଘ ପକ୍ଷରୁ ଅକ୍ଟୋବର ୨୨ରୁ ୨୮ ତାରିଖ ପର୍ଯ୍ୟନ୍ତ ରାଷ୍ଟ୍ରବ୍ୟାପୀ ପ୍ରତିବାଦ ସପ୍ତାହ ପାଳନ କରାଯାଉଛି। ସଂଶୋଧିତ ସୀମା ଅନୁଯାୟୀ ୨୦୨୫-୨୬ ବର୍ଷର ବୋନସ୍ର ପାର୍ଥକ୍ୟ ରାଶି ଦୀପାବଳି ୨୦୨୬ ପୂର୍ବରୁ ପ୍ରଦାନ କରିବାକୁ ଇଷ୍ଟ କୋଷ୍ଟ ରେଳ ମଜଦୁର ସଂଘ (ଇକୋଆର୍ଏମ୍ଏସ୍)ର ମହାମନ୍ତ୍ରୀ ତ୍ରିଲୋଚନ ସାହୁ ଦାବି କରିଛନ୍ତି।
ଶ୍ରୀ ସାହୁ କହିଛନ୍ତି ଯେ ଭାରତୀୟ ରେଳ ଦେଶର ଜୀବନରେଖା। ରେଳ କର୍ମଚାରୀମାନେ କଠିନ ପରିସ୍ଥିତିରେ ଦିନରାତି କାର୍ଯ୍ୟ କରି ଯାତ୍ରୀଙ୍କ ସୁରକ୍ଷିତ ଯାତ୍ରା, ମାଲ ପରିବହନ, ରେଳ ସମ୍ପତ୍ତିର ରକ୍ଷଣାବେକ୍ଷଣ ଏବଂ ଦେଶର ଆର୍ଥିକ ପ୍ରଗତିରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଉଛନ୍ତି। ୨୦୨୫-୨୬ ଆର୍ଥିକ ବର୍ଷରେ ୧,୬୭୦ ନିୟୁତ ଟନ୍ର ରେକର୍ଡ ମାଲ ପରିବହନ ଏବଂ ପ୍ରାୟ ୭.୪୧ ବିଲିୟନ ଯାତ୍ରୀଙ୍କୁ ପରିବହନ କରିବାର ସଫଳତା କର୍ମଚାରୀଙ୍କ ପରିଶ୍ରମ, ସମର୍ପଣ ଓ କାର୍ଯ୍ୟଦକ୍ଷତାର ପ୍ରମାଣ।
ଶ୍ରୀ ସାହୁ କହିଛନ୍ତି ଯେ କେନ୍ଦ୍ରୀୟ ମନ୍ତ୍ରିମଣ୍ଡଳ ପକ୍ଷରୁ ରେଳ କର୍ମଚାରୀଙ୍କୁ ୭୮ ଦିନର ଉତ୍ପାଦକତା ସଂଲଗ୍ନ ବୋନସ୍ ପ୍ରଦାନକୁ ଅନୁମୋଦନ କରାଯିବା ସ୍ୱାଗତଯୋଗ୍ୟ। କିନ୍ତୁ ବୋନସ୍ର ସର୍ବାଧିକ ରାଶି ୧୭,୯୫୧ ଟଙ୍କା ଦୀର୍ଘ ବର୍ଷ ଧରି ଅପରିବର୍ତ୍ତିତ ରହିଛି। ରେଳବାଇର ଉତ୍ପାଦକତା ଓ କର୍ମଚାରୀଙ୍କ କାର୍ଯ୍ୟଭାର ବଢ଼ୁଥିବା ସତ୍ତ୍ୱେ ବୋନସ୍ ଗଣନା ସୀମାରେ ଆବଶ୍ୟକ ସଂଶୋଧନ ନ ହେବା କର୍ମଚାରୀଙ୍କ ମନୋବଳକୁ ପ୍ରଭାବିତ କରୁଛି।
ଭାରତ ସରକାରଙ୍କ ଶ୍ରମ ଓ ନିଯୁକ୍ତି ମନ୍ତ୍ରଣାଳୟର ୨୮ ଅଗଷ୍ଟ ୨୦୧୫ର ପତ୍ର ଏବଂ ବୋନସ୍ ଗଣନା ସୀମା ସମ୍ପର୍କିତ ରାଜପତ୍ର ବିଜ୍ଞପ୍ତିର ଉଲ୍ଲେଖ କରି ସେ କହିଛନ୍ତି ଯେ ବର୍ତ୍ତମାନର ବେତନ ଢାଞ୍ଚା, ବଢ଼ୁଥିବା ମହଙ୍ଗା ଏବଂ କର୍ମଚାରୀଙ୍କ ଯୋଗଦାନକୁ ବିଚାରକୁ ନେଇ ବୋନସ୍ ଗଣନା ସୀମାର ସମୀକ୍ଷା ଆବଶ୍ୟକ। ସପ୍ତମ କେନ୍ଦ୍ରୀୟ ବେତନ ଆୟୋଗ ଅନୁଯାୟୀ ନିର୍ଦ୍ଧାରିତ ୧୮,୦୦୦ ଟଙ୍କାର ସର୍ବନିମ୍ନ ମୂଳ ବେତନ ସହ ସମନ୍ୱୟ ରଖି ବୋନସ୍ ଗଣନା ସୀମା ବୃଦ୍ଧି ପାଇଁ ସରକାର ଆବଶ୍ୟକ ନୀତିଗତ ଓ ଆଇନଗତ ସଂଶୋଧନ କରିବା ଉଚିତ।
ଶ୍ରୀ ସାହୁ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବାର ଲକ୍ଷ୍ୟ ହାସଲ କରିବାରେ ରେଳ କର୍ମଚାରୀଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେଣୁ କର୍ମଚାରୀଙ୍କ ଅବଦାନ ଓ ସଫଳତାକୁ କେବଳ ପ୍ରଶଂସାରେ ସୀମିତ ନ ରଖି ସେମାନଙ୍କୁ ଉଚିତ ଆର୍ଥିକ ଲାଭ ମଧ୍ୟ ପ୍ରଦାନ କରାଯିବା ଆବଶ୍ୟକ।
ବୋନସ୍ ଗଣନା ସୀମାକୁ ମାସିକ ୭,୦୦୦ ଟଙ୍କାରୁ ୧୮,୦୦୦ ଟଙ୍କାକୁ ବୃଦ୍ଧି କରିବା ସହ ସଂଶୋଧିତ ସୀମାକୁ ସମସ୍ତ ଯୋଗ୍ୟ ରେଳ କର୍ମଚାରୀଙ୍କ ପାଇଁ ତୁରନ୍ତ ଲାଗୁ କରିବାକୁ ସଂଘ ଦାବି କରିଛି। ଏହା ସହିତ ୨୦୨୫-୨୬ ବର୍ଷର ବୋନସ୍ର ପାର୍ଥକ୍ୟ ରାଶି ଦୀପାବଳି ପୂର୍ବରୁ ପ୍ରଦାନ କରିବା ଏବଂ ବେତନ ଢାଞ୍ଚା, ସର୍ବନିମ୍ନ ମଜୁରି, ମହଙ୍ଗା ଓ ରେଳବାଇର ବଢ଼ୁଥିବା ଉତ୍ପାଦକତା ଆଧାରରେ ନିୟମିତ ସମୀକ୍ଷା ବ୍ୟବସ୍ଥା କରିବାକୁ ମଧ୍ୟ ଦାବି କରାଯାଇଛି।
ଭାରତୀୟ ରେଳ ମଜଦୁର ସଂଘର ରାଷ୍ଟ୍ରବ୍ୟାପୀ ପ୍ରତିବାଦ ସପ୍ତାହ ଅନ୍ତର୍ଗତ ଅକ୍ଟୋବର ୨୨ରୁ ୨୬ ପର୍ଯ୍ୟନ୍ତ ଶାଖାସ୍ତରରେ ଜନଜାଗରଣ ଅଭିଯାନ ଚାଲିଛି। ଏହି ଅଭିଯାନରେ ପୋଷ୍ଟର ଲଗାଇବା ସହ ଲିଫ୍ଲେଟ୍ ବଣ୍ଟନ କରାଯାଇ କର୍ମଚାରୀଙ୍କୁ ଦାବିଗୁଡ଼ିକ ସମ୍ପର୍କରେ ସଚେତନ କରାଯାଉଛି।
ଅକ୍ଟୋବର ୨୭ରେ ମଣ୍ଡଳ ମୁଖ୍ୟାଳୟ ଏବଂ କର୍ମଶାଳାର ମୁଖ୍ୟ ଫାଟକ ସମ୍ମୁଖରେ ଧାରଣା, ଗେଟ୍ ମିଟିଂ ଓ ପ୍ରତିବାଦ କାର୍ଯ୍ୟକ୍ରମ ହେବ। ଅକ୍ଟୋବର ୨୮ରେ ଜୋନାଲ ମୁଖ୍ୟାଳୟ ଏବଂ ଉତ୍ପାଦନ ୟୁନିଟ୍ଗୁଡ଼ିକ ସମ୍ମୁଖରେ ପ୍ରତିବାଦ କରାଯିବ। ଏହି ଅବସରରେ ମଣ୍ଡଳ ରେଳ ପ୍ରବନ୍ଧକ (ଡିଆର୍ଏମ୍), ମୁଖ୍ୟ କର୍ମଶାଳା ପ୍ରବନ୍ଧକ (ସିଡବ୍ଲ୍ୟୁଏମ୍), ମହାପ୍ରବନ୍ଧକ (ଜିଏମ୍) କିମ୍ବା ଉପଲବ୍ଧ ବିଭାଗୀୟ ମୁଖ୍ୟଙ୍କ ମାଧ୍ୟମରେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯିବ।
ଶ୍ରୀ ତ୍ରିଲୋଚନ ସାହୁ ସମସ୍ତ ରେଳ କର୍ମଚାରୀଙ୍କୁ ଏହି ଆନ୍ଦୋଳନରେ ଏକଜୁଟ ହୋଇ ସକ୍ରିୟ ଭାବେ ଯୋଗଦେବାକୁ ଆହ୍ୱାନ ଦେଇଛନ୍ତି। ସେ କହିଛନ୍ତି ଯେ ଏହି ଆନ୍ଦୋଳନ କେବଳ ବୋନସ୍ ବୃଦ୍ଧିର ଦାବି ନୁହେଁ; ଏହା ରେଳ କର୍ମଚାରୀଙ୍କ ସମ୍ମାନ, ନ୍ୟାୟସଙ୍ଗତ ଅଧିକାର ଏବଂ ସେମାନଙ୍କ ପରିଶ୍ରମର ଉଚିତ ସ୍ୱୀକୃତି ପାଇଁ ଏକ ପ୍ରୟାସ।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
