କାଜିରଙ୍ଗା (ଆସାମ), ୧୪ ନଭେମ୍ବର (ହି.ସ.)- କାଜିରଙ୍ଗା ସଡ଼କ ଦୁର୍ଘଟଣାରେ ମୃତକଙ୍କ ସଂଖ୍ୟା ୨୬କୁ ବୃଦ୍ଧି ପାଇଛି। ଶନିବାର ସକାଳେ ଚିକିତ୍ସାଧୀନ ଅବସ୍ଥାରେ ଜଣେ ଯୁବତୀଙ୍କ ଯୋରହାଟ ମେଡିକାଲ କଲେଜ ଆଣ୍ଡ ହସ୍ପିଟାଲ (ଜେଏମସିଏଚ୍)ରେ ମୃତ୍ୟୁ ହୋଇଛି। ମୃତ ଯୁବତୀଙ୍କ ପରିଚୟ ଲକ୍ଷ୍ମୀ ମାଝୀ ବୋଲି ଜଣାପଡ଼ିଛି।

ଦୁର୍ଘଟଣାରେ ପ୍ରାଣ ହରାଇଥିବା ୨୬ ଜଣଙ୍କ ମଧ୍ୟରୁ ୨୩ ଜଣଙ୍କ ପରିଚୟ ମିଳିଥିବା ସୂଚନା ମିଳିଛି। ମୃତକମାନେ ହେଲେ ଦୀପାଞ୍ଜଳି ରଙ୍ଗଫାରପି, ଜ୍ୟୋତି ମାଝୀ, ଅନୁରାଗ ଗୋୱାଲା, ଦାମିନୀ ଘଟୋୱାଲ, ବେବି କର୍ମକାର, ଦର୍ପଣା ମାଝୀ, ସୁଭାଷ ଦାସ, ଗାଡ଼ି ଚାଳକ ଅବଦୁଲ ମଜିଦ, ପୂର୍ଣ୍ଣିମା ଗୋୱାଲା, ଅବଦୁଲ ରସିଦ ଅଲ୍ଲୀ, ଫୈଜୁଲ ଇସଲାମ, ଫରହାନା ୟାସମିନ, ସୁନୀଲ ଭୂମିଜ, ହାଇଜୁଲ ଇସଲାମ, ରଞ୍ଜିତା ଘଟୋୱାଲ, ମହମ୍ମଦ ରଫିକ, ଗଙ୍ଗା ଗୋୱାଲା, ମହମ୍ମଦ ଅଲ୍ଲୀ, ଫାରୁକ ଅହମ୍ମଦ, ଗୋଲାପୀ ବେଗମ, ମୀନା ମିରାଜ, ଦୀପକ ଗୁରୁଙ୍ଗ ଏବଂ ଶନିବାର ସକାଳେ ମୃତ୍ୟୁବରଣ କରିଥିବା ଲକ୍ଷ୍ମୀ ମାଝୀ।

ଆସାମର କାଜିରଙ୍ଗା ଜାତୀୟ ଉଦ୍ୟାନ ନିକଟରେ ଶୁକ୍ରବାର ଏକ ଭୟଙ୍କର ସଡ଼କ ଦୁର୍ଘଟଣା ଘଟିଥିଲା। ଏକ ମିନି ବସ୍ ଏବଂ କଂଟେନର ଟ୍ରକ୍ ମଧ୍ୟରେ ସାମ୍ନାସାମ୍ନି ଧକ୍କା ହେବାରୁ ୨୬ ଜଣଙ୍କ ମୃତ୍ୟୁ ହୋଇଛି। ଦୁର୍ଘଟଣାରେ ଆହତ ହୋଇଥିବା ଲୋକଙ୍କୁ ବିଭିନ୍ନ ହସ୍ପିଟାଲରେ ଭର୍ତି କରାଯାଇଛି।

ଶୁକ୍ରବାର ଦୁର୍ଘଟଣାସ୍ଥଳ ଏବଂ ଗୋଲାଘାଟ ଜିଲ୍ଲାର କହରା ହସ୍ପିଟାଲରେ ୨୩ ଜଣଙ୍କ ମୃତ୍ୟୁ ହୋଇଥିଲା। ଅନ୍ୟପକ୍ଷରେ, ଜେଏମସିଏଚ୍ରେ ଗତ ରାତି ସୁଦ୍ଧା ଦୁଇ ଜଣଙ୍କ ଏବଂ ଶନିବାର ସକାଳେ ଜଣେ ଯୁବତୀଙ୍କ ମୃତ୍ୟୁ ହୋଇଛି।

ସୂଚନା ଅନୁଯାୟୀ, ଜେଏମସିଏଚ୍ରେ ସାତ ଜଣ ଗୁରୁତର ଆହତଙ୍କ ଚିକିତ୍ସା ଆଇସିୟୁରେ ଚାଲିଛି। ଏହି ହସ୍ପିଟାଲରେ ମୋଟ କେତେ ଜଣ ଆହତ ଚିକିତ୍ସିତ ହେଉଛନ୍ତି, ସେନେଇ ଆଧିକାରିକ ସୂଚନା ମିଳିନାହିଁ। ସୂତ୍ର ଅନୁଯାୟୀ, ପ୍ରାୟ ୨୦ ଜଣ ଆହତଙ୍କୁ ଜେଏମସିଏଚ୍ରେ ଭର୍ତି କରାଯାଇଥିଲା।

ପ୍ରାୟ ୨୩ ଜଣ ମୃତକଙ୍କ ମୃତଦେହ ଗୋଲାଘାଟ ଜିଲ୍ଲା ହସ୍ପିଟାଲରେ ରଖାଯାଇଛି। ଆଜି ସେମାନଙ୍କର ଶବ ବ୍ୟବଚ୍ଛେଦ କରାଯିବ। ଶବ ବ୍ୟବଚ୍ଛେଦ ପାଇଁ ଗୁଆହାଟୀରୁ ମଧ୍ୟ ଡାକ୍ତରଙ୍କ ଏକ ଟିମ୍ ଗୋଲାଘାଟରେ ପହଞ୍ଚିଥିବା ଜଣାପଡ଼ିଛି। ଏହି ଭୟାବହ ଦୁର୍ଘଟଣା ଯୋଗୁଁ ସମଗ୍ର ରାଜ୍ୟରେ ଗଭୀର ଶୋକର ଛାୟା ଖେଳିଯାଇଛି।

ବିଭିନ୍ନ ରାଜନୈତିକ ଦଳ ଏବଂ ସଂଗଠନ ଜାତୀୟ ରାଜପଥ ପ୍ରଶାସନ ଉପରେ ରାସ୍ତା ମରାମତି ପ୍ରତି ଧ୍ୟାନ ନଦେବାର ଅଭିଯୋଗ ଆଣିଛନ୍ତି। ଲୋକଙ୍କ କହିବା ଅନୁଯାୟୀ, ଜାତୀୟ ରାଜପଥ ବିଭାଗ ବିଭିନ୍ନ ସ୍ଥାନରେ ଟୋଲ୍ ଆଦାୟ କରୁଥିବା ବେଳେ ରାସ୍ତା ମରାମତି ପାଇଁ କୌଣସି ପଦକ୍ଷେପ ନେଉନାହିଁ।

---------------

ହିନ୍ଦୁସ୍ଥାନ ସମାଚାର / ଗଗନ