ନୂଆଦିଲ୍ଲୀ, ୧୪ ନଭେମ୍ବର (ହି.ସ.)- ଦିଲ୍ଲୀର ଭାରତ ମଣ୍ଡପମ୍ରେ ଆୟୋଜିତ ୪୫ତମ ଭାରତୀୟ ଅନ୍ତର୍ଜାତୀୟ ବାଣିଜ୍ୟ ମେଳାରେ ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏକ ସ୍ୱତନ୍ତ୍ର ମଣ୍ଡପ ସ୍ଥାପନ କରାଯାଇଛି। ଏଥିରେ ୨୪ଟି ଜାତୀୟ ସ୍ୱାସ୍ଥ୍ୟ କାର୍ଯ୍ୟକ୍ରମ ଓ ସଂସ୍ଥାର ୩୯ଟି ଷ୍ଟଲ୍ ମାଧ୍ୟମରେ ସରକାରୀ ସ୍ୱାସ୍ଥ୍ୟ ଯୋଜନା, ପରୀକ୍ଷା ଏବଂ ଚିକିତ୍ସା ସେବା ସମ୍ପର୍କରେ ସୂଚନା ଦିଆଯାଉଛି। ଏହି ମଣ୍ଡପ ନଭେମ୍ବର ୧୪ରୁ ୨୭ ପର୍ଯ୍ୟନ୍ତ ସାଧାରଣ ଲୋକଙ୍କ ପାଇଁ ଖୋଲା ରହିବ।

କେନ୍ଦ୍ରୀୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଆୟୋଜିତ ଏହି ମଣ୍ଡପର ଉଦ୍ଘାଟନ ଶନିବାର ନୀତି ଆୟୋଗର ସଦସ୍ୟ ଡ. ଏମ୍. ଶ୍ରୀନିବାସ କରିଥିଲେ। ଏହି ଅବସରରେ କେନ୍ଦ୍ରୀୟ ସ୍ୱାସ୍ଥ୍ୟ ସଚିବ ପୁଣ୍ୟ ସଲିଳା ଶ୍ରୀବାସ୍ତବ, ସ୍ୱାସ୍ଥ୍ୟ ଗବେଷଣା ବିଭାଗର ସଚିବ ତଥା ଭାରତୀୟ ଆୟୁର୍ବିଜ୍ଞାନ ଗବେଷଣା ପରିଷଦର ମହାନିର୍ଦ୍ଦେଶକ ଡ. ରାଜୀବ ବହଲ ଏବଂ ଜାତୀୟ ସ୍ୱାସ୍ଥ୍ୟ ପ୍ରାଧିକରଣର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁନୀଲ କୁମାର ବର୍ଣ୍ଣୱାଲ ଉପସ୍ଥିତ ଥିଲେ। ଏହି ମଣ୍ଡପର ବିଷୟବସ୍ତୁ ‘ଯୁବ ଭାରତ, ସୁସ୍ଥ ଭାରତ’ ରଖାଯାଇଛି।

ମଣ୍ଡପରେ ଆୟୁଷ୍ମାନ ଆରୋଗ୍ୟ ମନ୍ଦିର, ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା, ଇ-ସଞ୍ଜୀବନୀ, ସାର୍ବଜନୀନ ଟିକାକରଣ କାର୍ଯ୍ୟକ୍ରମ, ଟିବିମୁକ୍ତ ଭାରତ ଅଭିଯାନ ଏବଂ ଟେଲି-ମାନସ ସମେତ ଅନେକ ଯୋଜନା ସମ୍ପର୍କରେ ସୂଚନା ଦିଆଯାଉଛି। ଏଠାରେ ପ୍ରାଥମିକ ସ୍ୱାସ୍ଥ୍ୟ ସେବା, ମାତୃ ଓ ଶିଶୁ ସ୍ୱାସ୍ଥ୍ୟ, ମାନସିକ ସ୍ୱାସ୍ଥ୍ୟ, ଅଙ୍ଗଦାନ, ଖାଦ୍ୟ ସୁରକ୍ଷା ଏବଂ ବିଭିନ୍ନ ରୋଗର ପ୍ରତିରୋଧ ସହ ଜଡ଼ିତ ପଦକ୍ଷେପଗୁଡ଼ିକ ମଧ୍ୟ ପ୍ରଦର୍ଶିତ କରାଯାଇଛି।

ନୀତି ଆୟୋଗର ସଦସ୍ୟ ଡ. ଶ୍ରୀନିବାସ ଅଣ-ସଂକ୍ରାମକ ରୋଗ ଏବଂ ଜୀବନଶୈଳୀ ସହ ଜଡ଼ିତ ରୋଗର ବଢ଼ୁଥିବା ମାମଲା ଉପରେ ଉଲ୍ଲେଖ କରି ସମୟୋଚିତ ସ୍ୱାସ୍ଥ୍ୟ ପରୀକ୍ଷା ଓ ପ୍ରତିରୋଧମୂଳକ ପଦକ୍ଷେପ ଗ୍ରହଣର ଆବଶ୍ୟକତା ବିଷୟରେ କହିଥିଲେ। ଲୋକମାନେ ଖାଦ୍ୟପେୟ ଓ ଦୈନନ୍ଦିନ ଜୀବନଚର୍ଯ୍ୟାରେ ସୁସ୍ଥ ଅଭ୍ୟାସ ଆପଣାଇବାକୁ ସେ ଆହ୍ୱାନ ଦେଇଥିଲେ।

ମଣ୍ଡପରେ ଲୋକମାନଙ୍କୁ ସିପିଆର ର ପ୍ରତ୍ୟକ୍ଷ ପ୍ରଶିକ୍ଷଣ ଦିଆଯାଉଛି। ଏହା ବ୍ୟତୀତ ସ୍ୱାସ୍ଥ୍ୟ ସଚେତନତା ଅଧିବେଶନ, ନୁକ୍କଡ଼ ନାଟକ, ପ୍ରଶ୍ନୋତର ଏବଂ ଆଲୋଚନାଚକ୍ର ଆୟୋଜନ କରାଯାଉଛି। ପିଲାମାନଙ୍କ ପାଇଁ ଏକ ସ୍ୱତନ୍ତ୍ର କ୍ଷେତ୍ର ତିଆରି କରାଯାଇଛି। ସେଠାରେ ପାରମ୍ପରିକ ଖେଳ ଓ ମନୋରଞ୍ଜନମୂଳକ କାର୍ଯ୍ୟକଳାପ ମାଧ୍ୟମରେ ସେମାନଙ୍କୁ ସୁସ୍ଥ ଅଭ୍ୟାସ ସମ୍ପର୍କରେ ସଚେତନ କରାଯାଉଛି।

ମେଳାରେ ଯକ୍ଷ୍ମା (ଟିବି) ରୋଗ ସମ୍ପର୍କରେ ସଚେତନତା ପାଇଁ ଏକ ସ୍ୱତନ୍ତ୍ର ଷ୍ଟଲ୍ ମଧ୍ୟ ଖୋଲାଯାଇଛି। ଏଠାରେ କୃତ୍ରିମ ବୁଦ୍ଧିମତ୍ତା (ଏଆଇ) ଆଧାରିତ ହାତରେ ଧରି ହେଉଥିବା ଏକ୍ସ-ରେ ଉପକରଣ ମାଧ୍ୟମରେ ଟିବି ପରୀକ୍ଷା କରାଯାଉଛି। ଚିକିତ୍ସା ଅଧିକାରୀମାନେ ଲୋକଙ୍କୁ ପରାମର୍ଶ ମଧ୍ୟ ଦେଉଛନ୍ତି। ଏଥିସହିତ ଟିବିରେ ପୀଡ଼ିତ ଲୋକଙ୍କୁ ସହାୟତା କରିବା ପାଇଁ ନିକ୍ଷୟ ମିତ୍ର ଭାବେ ପଞ୍ଜୀକରଣ ସୁବିଧା ମଧ୍ୟ ଉପଲବ୍ଧ କରାଯାଇଛି।

---------------

ହିନ୍ଦୁସ୍ଥାନ ସମାଚାର / ଗଗନ