କାଠମାଣ୍ଡୁ, ୧୪ ନଭେମ୍ବର (ହି.ସ.)। ବିଶ୍ୱ ଜଳବାୟୁ ସମ୍ମିଳନୀ (ସିଓପି-31)ରେ ହିମାଳୟ ସମ୍ବନ୍ଧୀୟ ପ୍ରସଙ୍ଗଗୁଡ଼ିକୁ ପୃଥକ ଔପଚାରିକ ଏଜେଣ୍ଡାରେ ସାମିଲ କରାଯାଇନଥିଲେ ମଧ୍ୟ ନେପାଳ ନିଜର ଦାବିରୁ ପଛକୁ ହଟିବାକୁ ମନା କରିଦେଇଛି।

ତୁର୍କୀର ଅନ୍ତାଲ୍ୟାରେ ଚାଲିଥିବା ଏହି ସମ୍ମିଳନୀ ଅବସରରେ ବହୁପକ୍ଷୀୟ ଆଲୋଚନାରେ ନେପାଳ ହିମାଳୟ ଅଞ୍ଚଳ ପାଇଁ ସ୍ୱତନ୍ତ୍ର କାର୍ଯ୍ୟକ୍ରମ, ଆର୍ଥିକ ସହାୟତା ଏବଂ ବୈଷୟିକ ଦକ୍ଷତାର ବିକାଶ ପାଇଁ କ୍ରମାଗତ ଭାବେ ଦାବି ଉଠାଇ ଆସୁଛି।

ଜଳବାୟୁ ଅର୍ଥ ପାଣ୍ଠି ପ୍ରସଙ୍ଗରେ ନେପାଳ ବିକଶିତ ଦେଶଗୁଡ଼ିକର ଉତ୍ତରଦାୟିତ୍ୱ ଉପରେ ମଧ୍ୟ ପ୍ରଶ୍ନ ଉଠାଉଛି। ନେପାଳର କହିବା ଅନୁଯାୟୀ, ବିକଶିତ ଦେଶଗୁଡ଼ିକ ଆର୍ଥିକ ସହାୟତା ନେଇ ଯେଉଁ ପ୍ରତିଶ୍ରୁତି ଦେଇଥିଲେ, ତାହା ପୂରଣ କରିନାହାନ୍ତି। ଅନ୍ତର୍ଜାତୀୟ ଜଳବାୟୁ ପାଣ୍ଠିରେ ପର୍ଯ୍ୟାପ୍ତ ଅର୍ଥରାଶି ନାହିଁ। ଏଥିସହ ଜଳବାୟୁ ପରିବର୍ତ୍ତନର ପ୍ରଭାବର ମୁକାବିଲା ନାମରେ ବିକାଶଶୀଳ ଦେଶଗୁଡ଼ିକ ଉପରେ ଅତିରିକ୍ତ ଋଣ ବୋଝ ଲଦି ଦିଆଯିବା ଉଚିତ ନୁହେଁ।

ନେପାଳ ଜଳବାୟୁ ସଙ୍କଟ ସହିତ ଏଥିରୁ ସୃଷ୍ଟି ହେଉଥିବା ଆର୍ଥିକ ସୁଯୋଗର ପ୍ରସଙ୍ଗ ମଧ୍ୟ ଉଠାଇଛି। ବିଶ୍ୱ ଯେତେବେଳେ ତୈଳ, ଗ୍ୟାସ ଓ କୋଇଲା ବଦଳରେ ସ୍ୱଚ୍ଛ ଶକ୍ତିର ବ୍ୟବହାର ବୃଦ୍ଧି କରୁଛି, ସେତେବେଳେ ନେପାଳ ଭଳି ଦେଶଗୁଡ଼ିକୁ ମଧ୍ୟ ନିବେଶ, ବୈଷୟିକ ଜ୍ଞାନକୌଶଳ ଏବଂ ଆର୍ଥିକ ଲାଭ ମିଳିବା ଉଚିତ।

ହିନ୍ଦୁସ୍ଥାନ ସମାଚାର / ସ୍ୱାଗତିକା