

ଉଜ୍ଜୟିନୀ, ୨୦ ନଭେମ୍ବର (ହି.ସ.)। ମଧ୍ୟପ୍ରଦେଶର ଧର୍ମନଗରୀ ଉଜ୍ଜୟିନୀରେ ୬୮ତମ ଅଖିଳ ଭାରତୀୟ କାଳିଦାସ ସମାରୋହର ଉତ୍ସବମୁଖର ଶୁଭାରମ୍ଭ ହୋଇଛି। ସାତଦିନିଆ ଆୟୋଜନ ପୂର୍ବରୁ ଶୁକ୍ରବାର ମଙ୍ଗଳ କଳସ ଯାତ୍ରା ବାହାରିଥିଲା। ଏହା ସହିତ ସମାରୋହର ଔପଚାରିକ ଉଦ୍ଘାଟନ ପୂର୍ବରୁ ସାଂସ୍କୃତିକ କାର୍ଯ୍ୟକଳାପର ଶୁଭାରମ୍ଭ ହୋଇଛି।
ସଂସ୍କୃତି ବିଭାଗର ତତ୍ତ୍ୱାବଧାନରେ କାଳିଦାସ ସଂସ୍କୃତ ଏକାଡେମୀ ଏବଂ ସମ୍ରାଟ ବିକ୍ରମାଦିତ୍ୟ ବିଶ୍ୱବିଦ୍ୟାଳୟ ପକ୍ଷରୁ ଆୟୋଜିତ ଅଖିଳ ଭାରତୀୟ କାଳିଦାସ ସମାରୋହର ମୁଖ୍ୟ କାର୍ଯ୍ୟକ୍ରମ ନଭେମ୍ବର ୨୧ରୁ ୨୭ ତାରିଖ ପର୍ଯ୍ୟନ୍ତ କାଳିଦାସ ସଂସ୍କୃତ ଏକାଡେମୀରେ ଅନୁଷ୍ଠିତ ହେବ। ଏଥିରେ ଦେଶର ବିଭିନ୍ନ ଅଞ୍ଚଳର ସାହିତ୍ୟିକ, ବିଦ୍ୱାନ, କଳାକାର ଏବଂ ସଂସ୍କୃତିପ୍ରେମୀ ଯୋଗଦେବେ। ମହାକବି କାଳିଦାସଙ୍କ ସାହିତ୍ୟିକ ଐତିହ୍ୟକୁ କେନ୍ଦ୍ର କରି ବ୍ୟାଖ୍ୟାନ, ଗବେଷଣାମୂଳକ ଆଲୋଚନାଚକ୍ର, ନାଟକ ପରିବେଷଣ ଏବଂ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ।
ସମାରୋହର ଗୋଟିଏ ଦିନ ପୂର୍ବରୁ ଶୁକ୍ରବାର ଉଜ୍ଜୟିନୀରେ ପାରମ୍ପରିକ କଳସ ଯାତ୍ରା ବାହାରିଥିଲା। ସକାଳେ କ୍ଷିପ୍ରା ନଦୀ କୂଳରେ ଥିବା ରାମଘାଟରେ ମଙ୍ଗଳ କଳସ ପୂଜା କରାଯାଇଥିଲା। ଏହାପରେ ମାଳବୀ ଲୋକକଳାକାରମାନେ ଢୋଲ ଓ ଝାଞ୍ଜର ତାଳେ ତାଳେ ନୃତ୍ୟ କରି ଯାତ୍ରାରେ ସାମିଲ ହୋଇଥିଲେ।
ଚଳିତ ବର୍ଷ ଏହି ଯାତ୍ରା ଟାୱାର ଛକରୁ ଆରମ୍ଭ ହୋଇ ଫ୍ରିଗଞ୍ଜ, ଦେୱାସ ରୋଡ୍ ଏବଂ ଦଶହରା ପଡ଼ିଆ ଦେଇ କାଳିଦାସ ଏକାଡେମୀରେ ପହଞ୍ଚି ସମାପ୍ତ ହୋଇଥିଲା। ଏହି ଅବସରରେ କାଳିଦାସ ଏକାଡେମୀର ନିର୍ଦ୍ଦେଶକ ଗୋବିନ୍ଦ ଗନ୍ଧେ, ବିକ୍ରମ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଅର୍ପଣ ଭାରଦ୍ୱାଜଙ୍କ ସମେତ ଅନ୍ୟ ସମାଜସେବୀମାନେ ଉପସ୍ଥିତ ଥିଲେ। ଯାତ୍ରା ମାର୍ଗର ବିଭିନ୍ନ ସ୍ଥାନରେ ଆକର୍ଷଣୀୟ ଝୋଟି ଓ ରଙ୍ଗୋଲି ପ୍ରସ୍ତୁତ କରାଯାଇଥିଲା।
ହିନ୍ଦୁସ୍ଥାନ ସମାଚାର / ସ୍ୱାଗତିକା