ମାଲକାନଗିରି,୨୦ ଜୁନ୍ (ହି.ସ.) ମାଲକାନଗିରି ଜିଲ୍ଲା ମାଥିଲି ବନାଞ୍ଚଳ ଅନ୍ତର୍ଗତ ଡାଇଗୁଡ଼ା ଠାରେ ଗତ ବୁଧୁବାର ଏକ ଭାଲୁ ଆହତ ଅବସ୍ଥାରେ ଥିବା ସମ୍ବନ୍ଧରେ ଖବର ପାଇ ମାଲକାନଗିରି ରାପିଡ୍ ରେସପନ୍ସ୍ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଭାଲୁଟିକୁ ଉଦ୍ଧାର କରିଥିଲା । ପରବର୍ତ୍ତୀ ସମୟରେ ଭାଲୁଟିକୁ ଚିକିତ୍ସା ନିମନ୍ତେ ମାଥିଲି ବନାଞ୍ଚଳ କାର୍ଯ୍ୟାଳୟ ପରିସରକୁ ଅଣାଯାଇଥିଲା। ପ୍ରାଥମିକ ଚିକିତ୍ସା ପରେ ପଶୁ ଚିକିତ୍ସକ ଙ୍କ ତତ୍ତ୍ୱାବଧାନରେ ତାହାକୁ ନିରୀକ୍ଷଣରେ ରଖାଯାଇଥିଲା । ତେବେ ଭାଲୁଟି ଅତ୍ୟକ ଗୁରୁତର ଭାବେ ଆହତ ହୋଇଥିବାରୁ ଚିକିତ୍ସାଧୀନ ଅବସ୍ଥାରେ ବନାଞ୍ଚଳ କାର୍ଯ୍ୟାଳୟ ପରିସରରେ ବୁଧୁବାର ମୃତ୍ୟୁବରଣ କରିଥିଲା।

ତଦନ୍ତରୁ ଜଣାପଡ଼ିଥିଲା ଯେ, ଭାଲୁଟି ରାସ୍ତା ଅତିକ୍ରମ କରୁଥିବା ସମୟରେ କିଛି ବ୍ୟକ୍ତି ତାହାକୁ ଲାଠି, ଶାବଳ ଓ ପଥର ଦ୍ବାରା ଆକ୍ରମଣ କରି ଗୁରୁତର ଭାବେ ଆହତ କରିଥିଲେ I ଏହା ବନ୍ୟଜନ୍ତୁ (ସୁରକ୍ଷା) ଆଇନ, ୧୯୭୨ ଅନୁଯାୟୀ ଏକ ଗୁରୁତର ଅପରାଧା

ଘଟଣା ସମ୍ପର୍କିତ ବିଭିନ୍ନ ଭିଡିଓ ଓ ଅନ୍ୟାନ୍ୟ ପ୍ରମାଣ ସଂଗ୍ରହ କରି ବନ ବିଭାଗ ପକ୍ଷରୁତଦନ୍ତ କରାଯାଇଥିଲା । ମାଲକାନଗିରି ପୋଲିସ ବିଭାଗର ସହଯୋଗରେ ଘଟଣାରେ ସମ୍ପୃକ୍ତ ୫

ଜଣ ଅଭିଯୁକ୍ତଙ୍କୁ ଚିହ୍ନଟ କରାଯାଇ ଗିରଫ କରାଯାଇଛି ଏବଂ ସେମାନଙ୍କ ବିରୁଦ୍ଧରେ ବନ୍ୟଜନ୍ତୁ(ସୁରକ୍ଷା) ଆଇନ, ୧୯୭୨ ଅନୁଯାୟୀ ଧାରା ୯, ୧୧ ଏବଂ ୫୨ ର ବ୍ୟବସ୍ଥା ଉଲଂଘନ ଏବଂଏହି ଆଇନର ଧାରା ୫୧ ଅନୁଯାୟୀ ଦଣ୍ଡନୀୟ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ବନଖଣ୍ଡ ଅଧିକାରୀ ଖବରଦାତା ସମ୍ମିଳନୀ ରେ ପ୍ରକାଶ କରିଛନ୍ତି!

ଏବଂ ଅଭିଯୁକ୍ତମାନଙ୍କୁ ବିଚାର ବିଭାଗୀୟ ହାଜତକୁ ଆବଶ୍ୟକ ରିମାଣ୍ଡ ପାଇଁ କୋର୍ଟକୁ ପଠାଗଲା I ଧରାଯାଇଥିବା ଅଭିଯୁକ୍ତ ମାନେ ହେଲେ ଦଳପତିଗୁଡା ଗ୍ରାମର ଗୋବିନ୍ଦା ଗୌଡ଼ , ଧନୁର୍ଜୟ ଗୌଡ଼, ବସନ୍ତ କୁମାର ଖୋଲା, ସିରାଗୁଡା ଗ୍ରାମର ମଣ୍ଟୁ ନାୟକ, ଓ ଡାଇଗୁଡ଼ା ଗ୍ରାମର ବିଷ୍ଣୁ ମାଝୀ ।

ମାଲକାନଗିରି ବନ ବିଭାଗ ସାଧାରଣ ଜନତାଙ୍କୁ ଅନୁରୋଧ କରୁଛି ଯେ, ବନ୍ୟଜନ୍ତୁ ଦେଖିଲେ ସେମାନଙ୍କୁ ବିରକ୍ତ କିମ୍ବା ଆକ୍ରମଣ ନକରି ତୁରନ୍ତ ବନ ବିଭାଗ କିମ୍ବା ନିକଟସ୍ଥ ପୋଲିସକୁ ସୂଚନା ଦିଅନ୍ତୁ | ବନ୍ୟଜନ୍ତୁ ସଂରକ୍ଷଣ ଓ ମାନବ-ବନ୍ୟଜନ୍ତୁ ସହାବସ୍ଥାନ ପାଇଁ ସମସ୍ତଙ୍କ ସହଯୋଗ ଏକାନ୍ତ ଆବଶ୍ୟକ

---------------

ହିନ୍ଦୁସ୍ଥାନ ସମାଚାର / ଶିବବ୍ରତ