ଭୁବନେଶ୍ୱର, 20 ଜୁନ (ହି.ସ)

ଲିଙ୍ଗରାଜ ମନ୍ଦିରରେ ଦେବ ଦମ୍ପତିଙ୍କୁ ଭବ୍ୟ ସ୍ୱାଗତକରାଯାଇଛି । ଶୀତଳଷଷ୍ଠୀ

ଅବସରରେ କେଦାରଗୌରୀ ମନ୍ଦିର ପରିସରରେ ପାରମ୍ପରିକ ବୈଦିକ ରୀତିନୀତି ଅନୁଯାୟୀ ପ୍ରଭୁ ଲିଙ୍ଗରାଜ

ଓ ମାଆ ପାର୍ବତୀଙ୍କ ଦିବ୍ୟ ବିବାହ ସମ୍ପନ୍ନ ହୋଇଥିଲା। ବିବାହ ପରେ ଦେବଦମ୍ପତି ନବଦମ୍ପତି

ବେଶରେ ଭକ୍ତଙ୍କ ଦର୍ଶନ ଦେଇଥିଲେ ।ବିଦାୟ ପୂର୍ବରୁ ପାରମ୍ପରିକ ‘କନକାଞ୍ଜଳି’ ନୀତି ପାଳନ

କରାଯାଇଥିଲା। ଏହାପରେ ବିଳମ୍ବିତ ରାତିରେ ଦେବଦମ୍ପତି ବିମାନରେ ବିରାଜମାନ କରି ଭବ୍ୟ

ଶୋଭାଯାତ୍ରାରେ ଲିଙ୍ଗରାଜ ମନ୍ଦିର ଅଭିମୁଖେ ଯାତ୍ରା କରିଥିଲେ। ବାଦ୍ୟ, ବାଣ ଓ ବିଭିନ୍ନ

ସାଂସ୍କୃତିକ ପରିବେଷଣ ମଧ୍ୟରେ ଅନୁଷ୍ଠିତ ଏହି ପରିକ୍ରମା ପ୍ରତ୍ୟାବର୍ତ୍ତନ ଶୋଭାଯାତ୍ରାରେ

ବିଭିନ୍ନ ଅଞ୍ଚଳରୁ ଆସିଥିବା ଶ୍ରଦ୍ଧାଳୁ ଓ ସେବାୟତମାନେ ଉତ୍ସାହର ସହ ସାମିଲ ହୋଇଥିଲେ। ସମଗ୍ର

ପରିବେଶ ଭକ୍ତି ଓ ଆଧ୍ୟାତ୍ମିକତାରେ ଉତ୍ସବମୁଖର ହୋଇଉଠିଥିଲା। ଲିଙ୍ଗରାଜ ମନ୍ଦିରରେ ପହଞ୍ଚିବା

ପରେ ଦେବଦମ୍ପତିଙ୍କୁ ପାରମ୍ପରିକ ରୀତିରେ ସ୍ୱାଗତ କରାଯାଇଥିଲା। ପରେ ମନ୍ଦିରରେ ନିର୍ଦ୍ଧାରିତ

ଗୁପ୍ତନୀତି ଓ ଅନ୍ୟାନ୍ୟ ଧାର୍ମିକ ପରମ୍ପରା ସମ୍ପନ୍ନ ହୋଇଥିଲା। ଦେବାଦିଦେବ ମହାଦେବ ଓ ମାଆ

ପାର୍ବତୀଙ୍କ ଏହି ପବିତ୍ର ପରିକ୍ରମା ପ୍ରତ୍ୟାବର୍ତ୍ତନ କେବଳ ଏକ ଧାର୍ମିକ ନୀତି ନୁହେଁ, ବରଂ ଓଡ଼ିଶାର

ପ୍ରାଚୀନ ପରମ୍ପରା, ଆସ୍ଥା ଓ ସାଂସ୍କୃତିକ ଐତିହ୍ୟର ଏକ ଅନନ୍ୟ ପ୍ରତୀକ। ପ୍ରତିବର୍ଷ ଏହି ଅବସରରେ ହଜାର ହଜାର

ଭକ୍ତଙ୍କ ସମାଗମ ହୋଇଥାଏ ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା