ମାଲକାନଗିରି,୨୧ ଜୁନ୍ (ହି.ସ.)ଖଇରପୁଟ ବ୍ଲକ ଅନ୍ତର୍ଗତ ଡାରୱିନ୍ ସ୍ମାରକୀ ସ୍ନାତକ ମହାବିଦ୍ୟାଳୟ, କୁଡୁମୁଲୁଗୁମ୍ମା ପରିସରରେ ଆନ୍ତର୍ଜାତୀୟ ଯୋଗ ଦିବସ ଅନୁଷ୍ଠିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ଯୋଗ ପ୍ରଶିକ୍ଷକ ଭଗବାନ ସାହୁ ଯୋଗ ଦେଇଥିଲା ବେଳେ ମହାବିଦ୍ୟାଳୟ ର ଅଧ୍ୟକ୍ଷ ଅଶୋକ କୁମାର ପ୍ରଧାନ, ଓଡ଼ିଆ ଅଧ୍ୟାପିକା ସଞ୍ଜିତା ଖୋସଲା,ଏନ୍ ଏସ୍ ଏସ୍ କାର୍ଯ୍ୟକ୍ରମ ଅଧିକାରୀ ତଥା ଅଧ୍ୟାପକ ବିଶ୍ୱଜିତ୍ ମହାନ୍ତି, ଏନ୍ ସି ସି କାର୍ଯ୍ୟକ୍ରମ ଅଧିକାରୀ ଜହନ୍ କୋରା, କର୍ମଚାରୀ ଈଲୁପ୍ ମହାନ୍ତି, ଦିଲ୍ଲିପ କୁମାର ଡାକୁଆ ଓ ଶ୍ୟାମସୁନ୍ଦର ଦେଓ ପ୍ରମୁଖ ଉପସ୍ଥିତ ଥିଲେ । ଯୋଗ ପ୍ରଶିକ୍ଷକ ଶ୍ରୀ ସାହୁ ଯୋଗ ପ୍ରଟୋକଲ ଅନୁସାରେ ପ୍ରଥମେ ୟୋଗିକ୍ ଜଗିଙ୍ଗ, ବିଭିନ୍ନ ପ୍ରକାରର ଶାରିରୀକ କସରତ, ସୁକ୍ଷ୍ମ ବ୍ୟାୟାମ, ସୁର୍ଯ୍ୟ ନମସ୍କାର, ଭସ୍ତ୍ରିକା ପ୍ରାଣାୟମ, ଅନୁଲୋମ ବିଲୋମ, କପାଲଭାତ୍ତି,ନୋଲିକ୍ରିୟା, ଭ୍ରାମରୀ, ସିଂହାସନ ଓ ହାସ୍ୟାସନ ଭଳି ଯୋଗଶିକ୍ଷା ଦେଇଥିଲେ । କାର୍ଯ୍ୟକ୍ରମ ଶେଷରେ ଅଧ୍ୟକ୍ଷ ଶ୍ରୀ ପ୍ରଧାନ ସମସ୍ତଙ୍କୁ ଧନ୍ୟବାଦ ଦେବା ସହ କହିଥିଲେ ଯେ ବର୍ତ୍ତମାନ ପରିସ୍ଥିତିରେ ବିଶ୍ଵ ପରିବେଶ ଯେଉଁଭଳି ଭାବେ ପ୍ରଦୁଷିତ ହେବାରେ ଲାଗିଛି, ଯେମିତିକି ବାୟୁ ପ୍ରଦୂଷଣ, ଜଳ ପ୍ରଦୂଷଣ ଓ ପ୍ରଦୁଷିତ ଖାଦ୍ୟ ସେବନ ଦ୍ଵାରା ନାନା ପ୍ରକାରର ରୋଗ ବ୍ୟାଧିର ସମ୍ମୁଖୀନ ହେବା ସହ ଅକାଳ ମୃତ୍ୟୁବରଣ କରୁଛନ୍ତି । ଏଭଳି ସ୍ଥିତିରେ ଯୋଗ, ପ୍ରାଣାୟମ, ଶାରିରୀକ କସରତ ଓ ବ୍ୟାୟାମ କରିବା ଦ୍ୱାରା ଦେହ ସୁସ୍ଥ ଓ ମନ ପ୍ରଫୁଲ୍ଲିତ ରଖିବାରେ ସହାୟକ ହୋଇଥାଏ ଓ ଖାସକରି ପାଠ ପଢ଼ୁଥିବା ପିଲାଙ୍କ ମଧ୍ୟରେ ଏକାଗ୍ରତା ଓ ସ୍ମରଣ ଶକ୍ତି ବୃଦ୍ଧି ପାଇଥାଏ । ଆଜିର କାର୍ଯ୍ୟକ୍ରମରେ ମହାବିଦ୍ୟାଳୟ ର ଜାତୀୟ ସେବା ଯୋଜନା , ଯୂବ ରେଡକ୍ରସ ବାହିନୀ ଓ ଜାତୀୟ ସମର ଶିକ୍ଷାର୍ଥୀ ବାହିନୀର ପାଖାପାଖି ୫୦ ରୁ ଉର୍ଦ୍ଧ ସ୍ୱେଚ୍ଛାସେବୀ ଯୋଗ ଦେଇଥିଲେ ।
---------------
ହିନ୍ଦୁସ୍ଥାନ ସମାଚାର / ଶିବବ୍ରତ
