ଗଞ୍ଜାମ, ୨୧ ଅଗଷ୍ଟ (ହି.ସ.)- ସେନା ବାୟୁ ପ୍ରତିରକ୍ଷା ପରିସରରେ ବ୍ରହ୍ମପୁର ପୋଲିସ ଓ ସେନା ବାୟୁ ପ୍ରତିରକ୍ଷା ଦଳ ମଧ୍ୟରେ ଏକ ବନ୍ଧୁତ୍ୱପୂର୍ଣ୍ଣ ଫୁଟବଲ ମ୍ୟାଚ୍ ଗୁରୁବାର ଅପରାହ୍ନରେ ଅନୁଷ୍ଠିତ ହୋଇଥିଲା। ଏହି ରୋମାଞ୍ଚକର ମୁକାବିଲାରେ ବ୍ରହ୍ମପୁର ପୋଲିସ ଦଳ ତିନି-ଏକ ଗୋଲରେ ବିଜୟ ଲାଭ କରିଛି।
ଏହି ମ୍ୟାଚ୍ ଦୁଇ ବାହିନୀ ମଧ୍ୟରେ ବନ୍ଧୁତା ଓ ପାରସ୍ପରିକ ସମ୍ମାନର ପ୍ରତୀକ ଥିଲା। ଉଭୟ ପକ୍ଷରୁ ବରିଷ୍ଠ ପୋଲିସ ଓ ସେନା ଅଧିକାରୀମାନେ ଉପସ୍ଥିତ ରହି ଖେଳାଳିମାନଙ୍କୁ ଉତ୍ସାହିତ କରିଥିଲେ। ପୋଲିସ ଦଳ ଭଲ ଆକ୍ରମଣ ଓ ଦୃଢ଼ ପ୍ରତିରକ୍ଷା ପ୍ରଦର୍ଶନ କରିଥିଲା, ସେନା ଦଳ ମଧ୍ୟ ଦୃଢ଼ ଲଢ଼େଇ କରି ଗୋଟିଏ ଗୋଲ ଦେଇଥିଲା।
ବରିଷ୍ଠ ଅଧିକାରୀମାନେ କହିଛନ୍ତି ଯେ, ଏଭଳି ଖେଳ ଶାରୀରିକ ସୁସ୍ଥତା ଓ ଦଳଗତ ଭାବନା ବଢ଼ାଇବା ସହ ପୋଲିସ ଓ ସେନା ମଧ୍ୟରେ ସମ୍ପର୍କକୁ ଆହୁରି ମଜବୁତ କରେ। ଶେଷରେ ଉଭୟ ଦଳ ପରସ୍ପରକୁ ହାତ ମିଳାଇ ପ୍ରଶଂସା କରିଥିଲେ। ଆଗକୁ ଏଭଳି ଆହୁରି ମ୍ୟାଚ୍ କରାଯିବ ବୋଲି ଉଭୟ ପକ୍ଷ ପ୍ରତିଶ୍ରୁତି ଦେଇଛନ୍ତି।
ହିନ୍ଦୁସ୍ଥାନ ସମାଚାର / ହୃଷୀକେଶ
