ମାଲକାନଗିରି, ୨୧ ଅଗଷ୍ଟ (ହି.ସ.)- ଆଦର୍ଶ ସ୍ନାତକ ମହାବିଦ୍ୟାଳୟରେ ଶକ୍ତିଶ୍ରୀ ସେଲ୍ ର ଉଦଘାଟନ ଏବଂ ଏକ ସଚେତନତାମୂଳକ ପାଠଚକ୍ର ସମାରୋହ ଉତ୍ସାହର ସହିତ ଅନୁଷ୍ଠିତ ହୋଇଯାଇଛି। ମହିଳା ଓ ଶିଶୁ ସୁରକ୍ଷା, ଅଧିକାର, ସଶକ୍ତିକରଣ ଏବଂ ବିଭିନ୍ନ ସାମାଜିକ ସମସ୍ୟା ସମ୍ପର୍କରେ ଛାତ୍ରଛାତ୍ରୀଙ୍କୁ ସଚେତନ କରିବା ଶକ୍ତିଶ୍ରୀ ସେଲ୍ ର ଏକ ପ୍ରମୁଖ ଉଦ୍ଦେଶ୍ୟ ବୋଲି ଏହି ଅବସରରେ ମତ ପ୍ରକାଶ ପାଇଥିଲା।
ମହାବିଦ୍ୟାଳୟର ଅଧ୍ୟକ୍ଷ ଡ. ଆଲୋକ କୁମାର ପାତ୍ର କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ। ମାଲକାନଗିରି ଜିଲ୍ଲାର କାରାଗାର ଅଧିକାରୀ ଦିଲ୍ଲୀପ କୁମାର ଜେନା ମୁଖ୍ୟ ଅତିଥି ଭାବେ ଯୋଗଦେଇ ଶିଶୁ ସୁରକ୍ଷା ଓ ଆଇନଗତ ସଚେତନତାର ଗୁରୁତ୍ୱ ଉପରେ ଆଲୋକପାତ କରିଥିଲେ। ଏହା ସହିତ ଶକ୍ତିଶ୍ରୀ ସଂଯୋଜକ ପ୍ରିତମ କୁମାର ମହଲା, ସହ-ସଂଯୋଜକ ଡ. ଦିବ୍ୟାଜ୍ୟୋତି ମଲ୍ଲିକ ଏବଂ ସୁଶ୍ରୀ ବିନ୍ଦୁରେଖା ପଣ୍ଡା ମଞ୍ଚାସୀନ ହୋଇ କାର୍ଯ୍ୟକ୍ରମର ଗରିମା ବୃଦ୍ଧି କରିଥିଲେ। ପାଠଚକ୍ରର ମୁଖ୍ୟ ଆଲୋଚ୍ୟ ବିଷୟ ଥିଲା “ଶିଶୁ ଯୌନ ଶୋଷଣ ନିବାରଣ ଆଇନ”। ଏହି ବିଷୟ ଉପରେ ଆଲୋଚନା କରି ବକ୍ତାମାନେ ଶିଶୁମାନଙ୍କ ପ୍ରତି ଯୌନ ଅପରାଧର ନିବାରଣ, ଶିଶୁମାନଙ୍କ ଆଇନଗତ ଅଧିକାର, ଅପରାଧ ଘଟିଲେ ଆଇନର ସହାୟତା ନେବାର ଆବଶ୍ୟକତା ଏବଂ ସମାଜରେ ଶିଶୁ ସୁରକ୍ଷା ପ୍ରତି ସମସ୍ତଙ୍କ ଦାୟିତ୍ୱ ସମ୍ପର୍କରେ ଆଲୋକପାତ କରିଥିଲେ।
ବକ୍ତାମାନେ କହିଥିଲେ ଯେ, ଶିଶୁମାନେ ସମାଜର ସବୁଠାରୁ ସମ୍ବେଦନଶୀଳ ବର୍ଗ ହୋଇଥିବାରୁ ସେମାନଙ୍କ ସୁରକ୍ଷା କେବଳ ପରିବାରର ଦାୟିତ୍ୱ ନୁହେଁ; ଏଥିପାଇଁ ଶିକ୍ଷାନୁଷ୍ଠାନ, ପ୍ରଶାସନ ଏବଂ ସମାଜର ପ୍ରତ୍ୟେକ ବ୍ୟକ୍ତିଙ୍କର ସଚେତନ ଭୂମିକା ଆବଶ୍ୟକ। ଶିଶୁମାନଙ୍କୁ ନିଜ ଅଧିକାର ଓ ସୁରକ୍ଷା ସମ୍ପର୍କରେ ଜଣାଇବା ସହିତ ଅସୁବିଧା ବା ଅନ୍ୟାୟର ସମ୍ମୁଖୀନ ହେଲେ ବିଶ୍ୱସ୍ତ ବ୍ୟକ୍ତିଙ୍କୁ ଜଣାଇବା ଏବଂ ଆବଶ୍ୟକ ସ୍ଥଳେ ଆଇନଗତ ସହାୟତା ନେବା ଉପରେ ଗୁରୁତ୍ୱ ଦିଆଯାଇଥିଲା।
ଏହି ପାଠଚକ୍ର ମାଧ୍ୟମରେ ଛାତ୍ରଛାତ୍ରୀମାନେ ଶିଶୁ ସୁରକ୍ଷା ସମ୍ପର୍କିତ ଆଇନ ଓ ସାମାଜିକ ଦାୟିତ୍ୱ ବିଷୟରେ ଜ୍ଞାନ ଆହରଣ କରିବା ସହିତ ଏକ ସୁସ୍ଥ, ସୁରକ୍ଷିତ ଓ ସଚେତନ ସମାଜ ଗଠନରେ ନିଜ ଭୂମିକା ବିଷୟରେ ଅବଗତ ହୋଇଥିଲେ। ଶକ୍ତିଶ୍ରୀ ସେଲ୍ ପକ୍ଷରୁ ଏଭଳି ଗୁରୁତ୍ୱପୂର୍ଣ୍ଣ ଓ ସମସାମୟିକ ବିଷୟକୁ ନେଇ ପାଠଚକ୍ର ଆୟୋଜନକୁ ଉପସ୍ଥିତ ଅତିଥି, ଅଧ୍ୟାପକ-ଅଧ୍ୟାପିକା ଓ ଛାତ୍ରଛାତ୍ରୀମାନେ ପ୍ରଶଂସା କରିଥିଲେ।
କାର୍ଯ୍ୟକ୍ରମର ଶେଷ ପର୍ଯ୍ୟାୟରେ ଆକାଶ କୁମାର କୁଆଁର ଧନ୍ୟବାଦ ଅର୍ପଣ କରିଥିଲେ। ସେ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡ଼ିତ ସମସ୍ତଙ୍କୁ କୃତଜ୍ଞତା ଜଣାଇଥିଲେ। ଶିକ୍ଷା ସହିତ ସାମାଜିକ ଓ ଆଇନଗତ ସଚେତନତାକୁ ଗୁରୁତ୍ୱ ଦେଇ ଶକ୍ତିଶ୍ରୀ ସେଲ୍ ର ଏହି ପଦକ୍ଷେପ ଛାତ୍ରଛାତ୍ରୀଙ୍କ ସର୍ବାଙ୍ଗୀଣ ବିକାଶ ଓ ସୁରକ୍ଷିତ ସମାଜ ଗଠନ ଦିଗରେ ଏକ ପ୍ରଶଂସନୀୟ ପ୍ରୟାସ ବୋଲି ମତ ପ୍ରକାଶ ପାଇଥିଲା।
ହିନ୍ଦୁସ୍ଥାନ ସମାଚାର / ଶିବବ୍ରତ
