ଝାରସୁଗୁଡ଼ା, 05 ଅଗଷ୍ଟ (ହି.ସ.) ଜିଲ୍ଲାପାଳ କୁଣାଲ ମୋତିରାମ ଚହ୍ବାଣ ସ୍ଥାନୀୟ ଜୁଭେନାଇଲ ଜଷ୍ଟିସ ବୋର୍ଡ କାର୍ଯ୍ୟାଳୟ ପରିଦର୍ଶନ କରି ସେଠାରେ ଥିବା ଭିତ୍ତିଭୂମି, କୋଠରୀ ସୁବିଧା ଓ ଅନ୍ୟାନ୍ୟ ପ୍ରଶାସନିକ ବ୍ୟବସ୍ଥାର ସମୀକ୍ଷା କରିଛନ୍ତି। ପରିଦର୍ଶନ ସମୟରେ ଜିଲ୍ଲାପାଳ କାର୍ଯ୍ୟାଳୟର ପ୍ରତ୍ୟେକ ବିଭାଗ ବୁଲି ଦେଖିବା ସହ ବୋର୍ଡର ସଦସ୍ୟ ଓ କର୍ମଚାରୀଙ୍କ ସହ ଆଲୋଚନା କରିଥିଲେ। ଏହି ଗସ୍ତ କାଳରେ ଜିଲ୍ଲାପାଳ ବୋର୍ଡର ସଦସ୍ୟମାନଙ୍କ ପାଇଁ ନିର୍ଦ୍ଧାରିତ କୋଠରୀ, ସେମାନଙ୍କର କାର୍ଯ୍ୟାଳୟ ଭିତ୍ତିଭୂମି ଏବଂ ଶୁଣାଣି ସମୟରେ ଆବଶ୍ୟକ ହେଉଥିବା ବିଭିନ୍ନ ବ୍ୟବସ୍ଥା ଅନୁଧ୍ୟାନ କରିଥିଲେ। ବୋର୍ଡ ସଦସ୍ୟମାନେ ଯେପରି ସୁଚାରୁରୂପେ ଓ ବିନା କୌଣସି ପ୍ରତିବନ୍ଧକରେ ଆଇନଗତ ପ୍ରକ୍ରିୟା ସୁପରିଚାଳନା କରିପାରିବେ, ସେଥିପାଇଁ ଆବଶ୍ୟକୀୟ ଭିତ୍ତିଭୂମିର ତଦାରଖ କରିଛନ୍ତି। ଏହା ସହିତ ଆଇନଗତ ବିବାଦରେ ଥିବା ଶିଶୁମାନଙ୍କ ପାଇଁ ଉଦ୍ଦିଷ୍ଟ କୋଠରୀ, ବସିବା ବ୍ୟବସ୍ଥା ଓ ଅପେକ୍ଷାଗୃହର ଉପଲବ୍ଧତା ସମ୍ପର୍କରେ ମଧ୍ୟ ଜିଲ୍ଲାପାଳ ତଦାରଖ କରିଥିଲେ। ବୋର୍ଡକୁ ଆସୁଥିବା କିଶୋର-କିଶୋରୀମାନଙ୍କୁ ଯେପରି ଏକ ମାନସିକ ଭାବେ ସୁରକ୍ଷିତ, ଅନୁକୂଳ ଓ ସମ୍ମାନଜନକ ପରିବେଶ ମିଳିପାରିବ, ସେ ନେଇ ସମ୍ପୃକ୍ତ ଅଧିକାରୀଙ୍କୁ ପରାମର୍ଶ ଦେଇଛନ୍ତି। କାର୍ଯ୍ୟାଳୟରେ ଉପଲବ୍ଧ ସ୍ଥାନ ଓ କୋଠରୀଗୁଡ଼ିକର ସଠିକ୍ ବିନିଯୋଗ କରିବା ସହ ଆବଶ୍ୟକ ଭିତ୍ତିଭୂମିର ସୁଧାର ପାଇଁ ପଦକ୍ଷେପ ନେବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି। ଏହି ପରିଦର୍ଶନ ସମୟରେ ଜିଲ୍ଲା ପ୍ରଶାସନ ଏବଂ ଜୁଭେନାଇଲ ଜଷ୍ଟିସ ବୋର୍ଡର ଅନ୍ୟାନ୍ୟ କର୍ମଚାରୀ ଉପସ୍ଥିତ ଥିଲେ।
---------------
ହିନ୍ଦୁସ୍ଥାନ ସମାଚାର / ସଞ୍ଜୟ
