ମାଲକାନଗିରି, ୨୯ ସେପ୍ଟେମ୍ବର (ହି.ସ.)-

ଦୁର୍ଗମ ସ୍ୱାଭିମାନ ଅଞ୍ଚଳର ରୋଗୀଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ସହ ଯୋଡ଼ିବା ପାଇଁ ଚାଲୁଥିବା ଜନ୍ତାପାଇ–ମାଲକାନଗିରି ମାଗଣା ରୋଗୀ ପରିବହନ ସରକାରୀ ବସ୍ ସେବା ଗତ ୨୨ ଜୁଲାଇ ୨୦୨୬ରୁ ବନ୍ଦ ରହିଛି। ଦୀର୍ଘ ୬୮ ଦିନ ଧରି ସେବା ଠପ୍ ରହିବା ଯୋଗୁଁ ଦୁର୍ଗମ ଅଞ୍ଚଳର ରୋଗୀ ଓ ସେମାନଙ୍କ ସହଯୋଗୀମାନେ ଯାତାୟାତ ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି।

ସ୍ୱାଭିମାନ ଅଞ୍ଚଳର ଜନ୍ତାପାଇ ଠାରୁ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟ ପର୍ଯ୍ୟନ୍ତ ଗତ ପ୍ରାୟ ୫ ବର୍ଷ ଧରି ଏହି ମାଗଣା ବସ୍ ସେବା ଚାଲୁଥିଲା। ଦୁର୍ଗମ ଅଞ୍ଚଳର ଗରିବ, ଅସହାୟ ଓ ନିମ୍ନ ଆୟବର୍ଗର ଲୋକଙ୍କ ପାଇଁ ଏହା ଚିକିତ୍ସାଳୟ ପହଞ୍ଚିବାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ଥିଲା । ବସ୍ ସେବା ବନ୍ଦ ହେବା ପରେ ରୋଗୀମାନଙ୍କୁ ନିଜ ଖର୍ଚ୍ଚରେ ଦୂରଦୂରାନ୍ତ ଯାତ୍ରା କରି ଚିକିତ୍ସା ପାଇଁ ମାଲକାନଗିରି ଆସିବାକୁ ପଡ଼ୁଛି। ବିଶେଷକରି ଅର୍ଥନୈତିକ ଭାବେ ଦୁର୍ବଳ ପରିବାର ପାଇଁ ଏହି ଯାତାୟାତ ଖର୍ଚ୍ଚ ଏକ ବଡ଼ ସମସ୍ୟା ପାଲଟିଥିବା ଅଭିଯୋଗ ହୋଇଛି। ଏହାର ପ୍ରଭାବରେ କେତେକ ରୋଗୀ ସମୟରେ ଉଚ୍ଚତର ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚିପାରୁନଥିବା ମଧ୍ୟ କୁହାଯାଇଛି।

ଜୋଡ଼ାମ୍ବ ପ୍ରାଥମିକ ଚିକିତ୍ସାଳୟ, ଜାନ୍ବାଇ ପ୍ରାଥମିକ ଚିକିତ୍ସାଳୟ, ଚିତ୍ରକୋଣ୍ଡା ଉପଖଣ୍ଡ ଚିକିତ୍ସାଳୟ, କୋରୁକୋଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଏବଂ ବାଲିମେଳା ଏନ୍ଏସି ଅଧୀନ ଚିକିତ୍ସାଳୟ ସମେତ ବିଭିନ୍ନ ସ୍ୱାସ୍ଥ୍ୟକେନ୍ଦ୍ରରୁ ଉଚ୍ଚତର ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯାଉଥିବା ରୋଗୀମାନେ ମଧ୍ୟ ଏହି ବସ୍ ସେବା ଉପରେ ନିର୍ଭର କରୁଥିଲେ।

ବସ୍ ସେବା ବନ୍ଦ ହେବା ପରେ ଏହାକୁ ପୁନଃ ଚାଲୁ କରିବା ପାଇଁ ୭ ସେପ୍ଟେମ୍ବର ୨୦୨୬ରେ ଖଇରପୁଟ ବ୍ଲକ୍ ରେ ଅନୁଷ୍ଠିତ ଯୁଗ୍ମ ଜନଶୁଣାଣି କାର୍ଯ୍ୟକ୍ରମରେ ଆବେଦନ ଦିଆଯାଇଥିଲା। ତେବେ ଆବେଦନ ପରେ ମଧ୍ୟ ବସ୍ ସେବା ପୁନଃ ଚାଲୁ ହୋଇନଥିବାରୁ ଅସନ୍ତୋଷ ପ୍ରକାଶ ପାଇଛି।

ଏହି ପରିପ୍ରେକ୍ଷୀରେ ବାଲିମେଳାର ‘ସହଯୋଗ’ ସ୍ୱେଚ୍ଛାସେବୀ ସଂଗଠନ ପକ୍ଷରୁ ପୁନର୍ବାର ପ୍ରଶାସନଙ୍କ ଦୃଷ୍ଟି ଆକର୍ଷଣ କରାଯାଇଛି। ସଂଗଠନ ପକ୍ଷରୁ ଜନ୍ତାପାଇ–ମାଲକାନଗିରି ମାଗଣା ରୋଗୀ ବସ୍ ସେବାକୁ ଅବିଳମ୍ବେ ପୁନଃ ଚାଲୁ କରିବାକୁ ଦାବି ହୋଇଛି।

ବସ୍ ସେବା ପୁନଃ ଚାଲୁ କରିବା ସହ ଏହାର ଫେରନ୍ତା ସମୟସୂଚୀରେ ପରିବର୍ତ୍ତନ ପାଇଁ ମଧ୍ୟ ଦାବି ରହିଛି। ବର୍ତ୍ତମାନ ଫେରନ୍ତା ବସ୍ ଅପରାହ୍ନ ୪ଟାରେ ଛାଡ଼ୁଥିବା ସ୍ଥାନରେ ୫ଟାରେ ଛାଡ଼ିବାକୁ ସଂଗଠନ ପକ୍ଷରୁ ଅନୁରୋଧ କରାଯାଇଛି।

ଦୂରଦୂରନ୍ତରୁ ଆସୁଥିବା ରୋଗୀଙ୍କୁ ଓପିଡିରେ ଡାକ୍ତରଙ୍କ ପରାମର୍ଶ ନେବା ସହ ବିଭିନ୍ନ ପରୀକ୍ଷା କରାଇବା, ରିପୋର୍ଟ ସଂଗ୍ରହ କରିବା ଏବଂ ଔଷଧ ନେବାରେ ସମୟ ଲାଗୁଥିବାରୁ ୪ଟାରେ ବସ୍ ଛାଡ଼ିଲେ ଅନେକ ରୋଗୀ ଅସୁବିଧାରେ ପଡ଼ୁଥିବା ଅଭିଯୋଗ ରହିଛି। ତେଣୁ ଅପରାହ୍ନ ୫ଟାରେ ବସ୍ ଛାଡ଼ିଲେ ରୋଗୀମାନେ ଚିକିତ୍ସା ସମ୍ପର୍କିତ ଆବଶ୍ୟକ କାର୍ଯ୍ୟ ଶେଷ କରି ଘରକୁ ଫେରିପାରିବେ ବୋଲି ସଂଗଠନ ଯୁକ୍ତି ଦର୍ଶାଇଛି।

୨୨ ଜୁଲାଇରୁ ଏହି ଜନକଲ୍ୟାଣମୂଳକ ବସ୍ ସେବା କାହିଁକି ବନ୍ଦ ରହିଛି, ତାହାର ପ୍ରକୃତ କାରଣ ସାର୍ବଜନୀନ କରିବାକୁ ମଧ୍ୟ ଦାବି ହୋଇଛି। ପ୍ରଶାସନିକ, ପରିଚାଳନାଗତ କିମ୍ବା ଆର୍ଥିକ ସମସ୍ୟା ଯୋଗୁଁ ସେବା ବନ୍ଦ ହୋଇଥିଲେ ତାହାର ସମାଧାନ କରି ନିୟମିତ ଭାବେ ସେବା ଚାଲୁ ରଖିବାକୁ ଦାବି କରାଯାଇଛି। ସେହିପରି ଭବିଷ୍ୟତରେ ଏପରି ମାଗଣା ରୋଗୀ ପରିବହନ ସେବା ବିନା ପୂର୍ବ ସୂଚନାରେ ବନ୍ଦ ନହେବା ପାଇଁ ସ୍ଥାୟୀ ପରିଚାଳନା ବ୍ୟବସ୍ଥା କରିବା ସହ ଦୁର୍ଗମ ଅଞ୍ଚଳର ରୋଗୀଙ୍କ ଚାହିଦା ଅନୁଯାୟୀ ଆବଶ୍ୟକ ସ୍ଥଳେ ଅତିରିକ୍ତ ପରିବହନ ବ୍ୟବସ୍ଥା କରିବାକୁ ମଧ୍ୟ ଦାବି ହୋଇଛି।

ଦୁର୍ଗମ ସ୍ୱାଭିମାନ ଅଞ୍ଚଳର ଗରିବ ଓ ଅସହାୟ ରୋଗୀଙ୍କ ସ୍ୱାସ୍ଥ୍ୟସେବା ପ୍ରାପ୍ତିକୁ ଦୃଷ୍ଟିରେ ରଖି ଜନ୍ତାପାଇ–ମାଲକାନଗିରି ମାଗଣା ବସ୍ ସେବାକୁ ଶୀଘ୍ର ପୁନଃ ଚାଲୁ କରିବା ସହ ଫେରନ୍ତା ବସ୍ ର ସମୟ ଅପରାହ୍ନ ୫ଟା କରିବାକୁ ‘ସହଯୋଗ’ ସ୍ୱେଚ୍ଛାସେବୀ ସଂଗଠନ ପକ୍ଷରୁ ଦୃଢ଼ ଦାବି କରାଯାଇଛି।

ହିନ୍ଦୁସ୍ଥାନ ସମାଚାର / ଶିବବ୍ରତ