ଜୟପୁର, ୨୯ ସେପ୍ଟେମ୍ବର (ହି.ସ.)- ବିକ୍ରମ ଦେବ ବିଶ୍ୱବିଦ୍ୟାଳୟ, ଜୟପୁର, ଓଡ଼ିଶା ପକ୍ଷରୁ ଆୟୋଜିତ ବିଶ୍ୱବିଦ୍ୟାଳୟ ସ୍ତରୀୟ ନବସୃଜନ ଓ ନବୋଦ୍ୟୋଗ ପ୍ରତିଯୋଗିତା–୨୦୨୬ ଆଜି ବିପୁଳ ଉତ୍ସାହ ଓ ଉଦ୍ଦୀପନାର ସହିତ ଆରମ୍ଭ ହୋଇଛି। ବିଶ୍ୱବିଦ୍ୟାଳୟର ବିଭିନ୍ନ ଅନୁବନ୍ଧିତ ମହାବିଦ୍ୟାଳୟରୁ ଛାତ୍ରଛାତ୍ରୀମାନେ ଏହି ପ୍ରତିଯୋଗିତାରେ ଯୋଗଦେଇ ନିଜର ନବୀନ ଚିନ୍ତାଧାରା, ସୃଜନଶୀଳତା ଓ ଉଦ୍ୟମୀ ପ୍ରତିଭା ପ୍ରଦର୍ଶନ କରିଛନ୍ତି। ବିଶ୍ୱବିଦ୍ୟାଳୟର ମୋଟ ୨୭ଟି ଅନୁବନ୍ଧିତ ମହାବିଦ୍ୟାଳୟ ଏହି ପ୍ରତିଯୋଗିତାରେ ଅଂଶଗ୍ରହଣ କରୁଛନ୍ତି। ପ୍ରତ୍ୟେକ ମହାବିଦ୍ୟାଳୟ ପକ୍ଷରୁ ଅନୁଷ୍ଠାନ ସ୍ତରୀୟ ମହାବିଦ୍ୟାଳୟ ସ୍ତରୀୟ ନବସୃଜନ ଓ ନବୋଦ୍ୟୋଗ ପ୍ରତିଯୋଗିତାର ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ପ୍ରତିଯୋଗୀମାନଙ୍କୁ ୟୁନିଭର୍ସିଟି ସ୍ତରକୁ ପଠାଯାଇଛି। ଫଳରେ ବିଭିନ୍ନ ମହାବିଦ୍ୟାଳୟର ପ୍ରତିଭାବାନ ଯୁବ ନବସୃଜନକାରୀମାନେ ଏକ ସାଧାରଣ ମଞ୍ଚରେ ନିଜ ପ୍ରତିଭା ପ୍ରଦର୍ଶନ କରିବାର ସୁଯୋଗ ପାଇଛନ୍ତି।ଉଦ୍ଘାଟନୀ କାର୍ଯ୍ୟକ୍ରମରେ ବିକ୍ରମ ଦେବ ବିଶ୍ୱବିଦ୍ୟାଳୟର ଳପତି ପ୍ରଫେସର ହୃଷୀକେଶ ସେନାପତି, ସମ୍ମାନନୀୟ କୁଳସଚିବ ମହେଶ୍ୱର ଚନ୍ଦ୍ର ନାଏକ ଏବଂ ସମ୍ମାନନୀୟ ପି.ଜି. କାଉନସିଲ୍ ଅଧ୍ୟକ୍ଷ ଡ. ପ୍ରଶାନ୍ତ କୁମାର ପାତ୍ର ଉପସ୍ଥିତ ରହି ଛାତ୍ରଛାତ୍ରୀମାନଙ୍କୁ ନିଜର ମୂଲ୍ୟବାନ ଅଭିଭାଷଣ ମାଧ୍ୟମରେ ଉତ୍ସାହିତ କରିଥିଲେ। ସେମାନେ ସମାଜ ଓ ରାଷ୍ଟ୍ରର ବିକାଶରେ ନବସୃଜନ, ସୃଜନଶୀଳତା ଓ ଉଦ୍ୟମିତାର ଗୁରୁତ୍ୱ ଉପରେ ଆଲୋକପାତ କରିଥିଲେ।ଏହି ଅବସରରେ ସମ୍ମାନନୀୟ ମୂଲ୍ୟାୟନ କମିଟି ସଦସ୍ୟ ବିଷ୍ଣୁ ପ୍ରସାଦ ପାତ୍ର, ଡୋମେନ୍ ବିଶେଷଜ୍ଞ ମନୋସିଷ ପଣ୍ଡା, ଉଦ୍ୟୋଗୀ ଏବଂ ଡ. ବ୍ରଜବନ୍ଧୁ ନନ୍ଦ, ବରିଷ୍ଠ ଅଧ୍ୟାପକ ଉପସ୍ଥିତ ରହିଥିଲେ। ସେମାନଙ୍କର ବିବିଧ କ୍ଷେତ୍ରର ବୃତ୍ତିଗତ ଓ ଶିକ୍ଷାଗତ ଅଭିଜ୍ଞତା ପ୍ରତିଯୋଗିତାର ମୂଲ୍ୟାୟନ ପ୍ରକ୍ରିୟାକୁ ଅଧିକ ସମୃଦ୍ଧ କରିଥିଲା। ଏହାସହ ଡ. ଅରୁଣ କୁମାର ରାଜ, ସିଙ୍ଗଲ୍ ପଏଣ୍ଟ କଣ୍ଟାକ୍ଟ ଅଫିସର, ଇନୋଭେସନ୍ ଓ ଷ୍ଟାର୍ଟ-ଅପ୍ ପ୍ରତିଯୋଗିତା–୨୦୨୬ ମଧ୍ୟ ଉପସ୍ଥିତ ରହି କାର୍ଯ୍ୟକ୍ରମର ସଫଳ ଆୟୋଜନରେ ମୂଲ୍ୟବାନ ସହଯୋଗ ପ୍ରଦାନ କରିଥିଲେ। ବିଶ୍ୱବିଦ୍ୟାଳୟ ପକ୍ଷରୁ ସମସ୍ତ ସମ୍ମାନନୀୟ ଅତିଥି ଓ ବିଶିଷ୍ଟ ବ୍ୟକ୍ତିବିଶେଷଙ୍କୁ ମାନପତ୍ର, ଉତ୍ତରୀୟ ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ମାନିତ କରାଯାଇଥିଲା।ନିଜ ନିଜ ଅଭିଭାଷଣରେ ଅତିଥିମାନେ ଇନୋଭେସନ୍ ଓ ଷ୍ଟାର୍ଟ-ଅପ୍ ପ୍ରତିଯୋଗିତାର ଗୁରୁତ୍ୱକୁ ପ୍ରଶଂସା କରିବା ସହ ଛାତ୍ରଛାତ୍ରୀମାନଙ୍କୁ ସୃଜନଶୀଳ ଚିନ୍ତାଧାରା, ସମସ୍ୟାର ସମାଧାନ ଖୋଜିବାର ଦକ୍ଷତା ଓ ଉଦ୍ୟମୀ ମନୋଭାବ ବିକଶିତ କରିବାକୁ ପ୍ରେରଣା ଦେଇଥିଲେ। ନିଜର ନବୀନ ଚିନ୍ତାଧାରାକୁ ଆତ୍ମବିଶ୍ୱାସର ସହିତ ଆଗକୁ ନେଇ ତାହାକୁ ସମାଜୋପଯୋଗୀ ସମାଧାନରେ ପରିଣତ କରିବାକୁ ସେମାନେ ଆହ୍ୱାନ ଜଣାଇଥିଲେ।

ହିନ୍ଦୁସ୍ଥାନ ସମାଚାର / ପିକେପି