ସମ୍ବଲପୁର, ୧୨ ସେପ୍ଟେମ୍ବର(ହି.ସ.) –ଲାଂଚନେଇ ଭିଜିଲାନ୍ସ ଦ୍ୱାରା ୨୦୧୯ ବ୍ୟାଚ ଓଏଏସ ଟପ୍ପର ତଥା ବାମରା ତହସିଲଦାର ଅଶ୍ୱିନୀ ପଣ୍ଡା ଗିରଫ ହୋଇଛନ୍ତି।
ଏହି ଉକେôାଚ ଟଙ୍କା ଦେଣ ନେଣରେ ପ୍ରମୁଖ ମାଧ୍ୟମ ସାଜି ଆସୁଥିବା ଶ୍ରୀ ପଣ୍ଡାଙ୍କ ଗାଡି ଡ୍ରାଇଭର ପ୍ରବୀଣ କୁମାରକୁ ମଧ୍ଯ ଗିରଫ କରାଯାଇଛିବୋଲି କହିଛନ୍ତି ସମ୍ବଲପୁର ଭିଜିଲାନ୍ସ ଏସ୍ପି ପ୍ରଦ୍ୟୁମ୍ନ କୁମାର ଦ୍ୱିବେଦୀ। ତହସିଲଦାର ଶ୍ରୀ ପଣ୍ଡା ଗତ ଜୁଲାଇ ମାସରେ କାର୍ଯ୍ୟରେ ଯୋଗ ଦେବା ପରେ ଭଡ଼ା ଘରଟିଏ ନପାଇ ନିକଟସ୍ଥ ଆଇବିରେ ରହୁଥିଲେ।
ସୂଚନାନୁଯାୟୀ ବାମରା ବ୍ଲକ ସଦର ମହକୁମା ସ୍ଥିତ ଗୋବିନ୍ଦପୁରର ଭିକି ନାଏକ ବ୍ୟକ୍ତିଙ୍କ ଏକ ଜମିର ମ୍ୟୁଟେସନ ଓ ଚାଷରୁ ଘରବାରୀ କିସମ ପରିବର୍ତନ ପାଇଁ ବାମରା ତହସିଲ ଅଫିସରେ ଆବେଦନ କରିଥିଲେ। ମାତ୍ର ଏହି କାର୍ଯ୍ୟ ପାଇଁ ତହସିଲଦାର ଅଶ୍ୱିନୀ ପଣ୍ଡା ମୋଟା ଅଙ୍କର ଲାଂଚ ଦାବି କରିଥିଲେ। ଏପରିକି ଏଥିରେ କିଛି କୋହଳ କରିବା ପାଇଁ ଭିକି ଅନୁରୋଧ କରିଥିଲେ ମଧ୍ୟ ଶ୍ରୀ ପଣ୍ଡା ରୋକଠୋକ ମନା କରିଦେଇ ଥିଲେ। ଜମିର କିସମ ପରିବର୍ତନ ଜରୁରୀ ଓ ତହସିଲଦାରଙ୍କ ଦାବି ମୁତାବକ ଉତ୍କୋଚର ଜରୁରୀ ସମାଧାନ କରିନପାରି ଶେଷରେ ସମ୍ବଲପୁର ଭିଜିଲାନ୍ସ ନିକଟରେ ଗୁହାରି କରିଥିଲେ। ଶୁକ୍ରବାର ଦିନ ପ୍ରାୟ ୧୧ଟା ସମୟରେ ତହସିଲଦାର ଶ୍ରୀ ପଣ୍ଡାଙ୍କ ଗାଡି ଡ୍ରାଇଭର ପ୍ରବୀଣ କୁମାର ତହସିଲଦାରଙ୍କ ନିର୍ଦ୍ଦେଶ କ୍ରମେ ନିର୍ଦ୍ଧିଷ୍ଟ ସ୍ଥାନରେ ୧୫ ହଜାର ଟଙ୍କା ଲାଂଚ ନେଉଥିବା ସମୟରେ ଭିଜିଲାନ୍ସ ଟିମ୍ ସେହିଠାରେ ହିଁ ଟଙ୍କା ସହ ପ୍ରବୀଣକୁ ମାଡି ବସିଥିଲେ। ଜେରା ବେଳେ ଲାଂଚ ଟଙ୍କା ସମ୍ପର୍କରେ ପ୍ରବୀଣ ସମସ୍ତ ତଥ୍ୟ ଦେବା ପରେ ତହସିଲଦାର ଅଶ୍ୱିନୀ ପଣ୍ଡା ଓ ତାଙ୍କ ଡ୍ରାଇଭର ଥିବା ପ୍ରବୀଣ କୁମାରକୁ ଭିଜିଲାନ୍ସ ସମ୍ବଲପୁର ହେଡ କ୍ୱାର୍ଟରକୁ ଉଠାଇ ନେଇଥିବା ଜଣାପଡିଛି। ଘଟଣାର ଯାଂଚ ପରେ ପରବର୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି। ସୂଚନାଯୋଗ୍ୟ ଭିଜିଲାନ୍ସ ଜାଲରେ ଶ୍ରୀ ପଣ୍ଡା ପଡିବା ପରେ ତାଙ୍କର ବିଭିନ୍ନ ସ୍ଥାନରେ ଭିଜିଲାନ୍ସ ଚଢାଉ କରିଥିଲା। ତାଙ୍କ ପତ୍ନୀ ରହୁଥିବା ଫ୍ଲାଟରୁ ନଗଦ ୪ ଲକ୍ଷ ୭୩ ହଜାର ଟଙ୍କା ଭିଜିଲାନ୍ସ ଜବତ କରିଛି ବୋଲି ସମ୍ବଲପୁର ଭିଜିଲାନ୍ସ ଏସପି ପ୍ରଦ୍ଯୁମ୍ନ ଦ୍ୱିବେଦୀ ସୂଚନା ଦେଇଛନ୍ତି ।ଉଲ୍ଲେଖଯୋଗ୍ୟ ରାଜ୍ୟର ବିଭିନ୍ନ ସ୍ଥାନରେ ଜମିବାଡ଼ି ସମ୍ପର୍କିତ କାଗଜାତ ସଂଶୋଧନ ଓ ବିକ୍ରିବଟାରେ ବ୍ୟାପକ ଦୁର୍ନୀତି ହେଉଥିବା ଯୋଗୁଁ ଏବେ ଏହି ବିଭାଗକୁ ସ୍ୱଚ୍ଛ ଓ ନିର୍ମଳ କରିବା ପାଇଁ ରାଜ୍ୟ ଭିଜିଲାନ୍ସ ବିଭାଗ ସ୍ୱତନ୍ତ୍ର ପଦକ୍ଷେପ ନେଉଛି।
ହିନ୍ଦୁସ୍ଥାନ ସମାଚାର/ଶୈଳେଶ/ବୀଣାପାଣି
.......................................
ହିନ୍ଦୁସ୍ଥାନ ସମାଚାର / ଶୈଳେଶ
