ବଲାଙ୍ଗିର, ୧୫ ଜାନୁଆରୀ (ହି.ସ.)- ବଲାଙ୍ଗିର ଉପଜିଲ୍ଲାପାଳ ଆଲୋକ କୁମାର ପଟେଲଙ୍କ ନିର୍ଦ୍ଦେଶ କ୍ରମେ ଆଜି ଆଗଲପୁରର ବ୍ଲକରେ ହେଉଥିବା ଅବୈଧ ଖଣି ଖନନ ଏବଂ ପରିବହନ ଉପରେ ଚଢଉ କରାଯାଇଥିଲା । ଜିଲ୍ଲା ପ୍ରଶାସନ ଓ ଖଣି ବିଭାଗ ଦ୍ଵାରା ମିଳିତ ଭାବେ ରଫାଖୋଲ ଗ୍ରାମ ନିକଟ ଅଙ୍ଗ ନଦୀ ଠାରେ ଏହି ଚଢଉ କରାଯାଇଥିଲା । ବାଲି ମଫିଆମାନେ ନଦୀବନ୍ଧରେ ଥିବା ବନ୍ୟା ପ୍ରତିରୋଧକ କାନ୍ଥକୁ କାଟି ନଦୀ ମଧ୍ୟକୁ ରାସ୍ତା କରିଛନ୍ତି । ବାଲି ଚୋରା ଚାଲାଣରେ ସମ୍ପୃକ୍ତ ତିନୋଟି ହାଇୱା ଜବତ କରାଯାଇ ସାଲେଭଟା ଥାନାକୁ ହସ୍ତାନ୍ତର କରାଯାଇଛି । ସେଠାରେ ଏକ ଚେନ୍ ମାଉଣ୍ଟ ଏକ୍ସଭେଟରକୁ ମଧ୍ୟ ଜବତ କରାଯାଇଛି । ଏହାର ମାଲିକଙ୍କୁ ଠାବ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କନିଷ୍ଠ ଖଣି ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଜଳସେଚନ ବିଭାଗର ନିର୍ବାହୀ ଯନ୍ତ୍ରୀଙ୍କୁ, ଦୋଷୀ ବିରୁଦ୍ଧରେ ଏଫଆଇଆର ଦାଖଲ କରିବା ସହ ବନ୍ୟା ପ୍ରତିରୋଧକ କାନ୍ଥକୁ ଯଥାଶୀଘ୍ର ମରାମତି କରିବା ପାଇଁ ନିର୍ଦ୍ଦେଶ କରାଯାଇଛି ।
ଏହି ଚଢଉରେ ଡେପୁଟି କଲେକ୍ଟର ସତ୍ୟଜିତ ବାରିକ, ତହସିଲଦାର ଆଗଲପୁର ନବୀନ କିଶୋର ପାଢୀ, କନିଷ୍ଠ ଖଣି ଅଧିକାରୀ ଦେବାଶିଷ ଦେହୁରି, ଶୁଭମ ବିଶ୍ଵାଳ, ସହକାରୀ ଜିଲ୍ଲାପାଳ ଜୟକୃଷ୍ଣ ପାଣିଗ୍ରାହୀ, ସାଲେଭଟା ଆରଆଇ ଏବଂ ପୋଲିସ ସାମିଲ ଥିଲେ ।
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
