
ନୂଆଦିଲ୍ଲୀ, ୧୮ ନଭେମ୍ବର (ହି.ସ.)- ବାଂଲାଦେଶ କ୍ରିକେଟ୍ ଦଳର ୱିକେଟ୍କିପର ବ୍ୟାଟର ଲିଟନ ଦାସ ଗୋଟିଏ ଟେଷ୍ଟ ପାଳିରେ ୱିକେଟ୍କିପର ଭାବେ ସର୍ବାଧିକ ଶିକାର କରିବାର ବିଶ୍ୱ ରେକର୍ଡ ନିଜ ନାମରେ କରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷରେ ଜୋହାନ୍ସବର୍ଗରେ ଖେଳାଯାଉଥିବା ଟେଷ୍ଟ ମ୍ୟାଚ୍ର ପ୍ରଥମ ପାଳିରେ ଲିଟନ ୱିକେଟ୍ ପଛରେ ୬ଟି କ୍ୟାଚ୍ ଏବଂ ୨ଟି ଷ୍ଟମ୍ପିଂ ସହ ମୋଟ ୮ ଜଣ ଖେଳାଳିଙ୍କୁ ଆଉଟ୍ କରିଛନ୍ତି। ଏହି କ୍ରମରେ ସେ ପାଂଚ ଜଣ ୱିକେଟ୍କିପରଙ୍କ ମିଳିତ ରେକର୍ଡକୁ ପଛରେ ପକାଇଛନ୍ତି।
ଆଇସିସିର ୱେବସାଇଟ୍ ଅନୁଯାୟୀ, ଏହା ପୂର୍ବରୁ ପୁରୁଷ ଟେଷ୍ଟ କ୍ରିକେଟ୍ର ଗୋଟିଏ ପାଳିରେ ୱିକେଟ୍କିପରଙ୍କ ଦ୍ୱାରା ସର୍ବାଧିକ ୭ଟି ଶିକାର କରିବାର ରେକର୍ଡ ପାକିସ୍ତାନର ୱାସିମ ବାରି, ଇଂଲଣ୍ଡର ବବ୍ ଟେଲର, ନ୍ୟୁଜିଲାଣ୍ଡର ଇଆନ୍ ସ୍ମିଥ୍ ଏବଂ ୱେଷ୍ଟଇଣ୍ଡିଜ୍ର ରିଡ୍ଲି ଜାକବ୍ସ ଓ ଜୋଶୁଆ ଡା ସିଲଭାଙ୍କ ନାମରେ ଥିଲା।
ଉଲ୍ଲେଖନୀୟ କଥା ହେଉଛି, ଲିଟନଙ୍କ ଏହି ଚମତ୍କାର ପ୍ରଦର୍ଶନ ତାଙ୍କ ବ୍ୟାଟ୍ରୁ ଶତକ ବାହାରିବା ପରେ ଆସିଛି। ଏହି ମ୍ୟାଚ୍ରେ ସେ ବ୍ୟାଟିଂ ଏବଂ ୱିକେଟ୍କିପିଂ ଉଭୟ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି।
ପ୍ରଥମ ପାଳିରେ ଦକ୍ଷିଣ ଆଫ୍ରିକାର ୫୫୭ ରନ୍
ବାଂଲାଦେଶ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦୁଇଟି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ ଜୋହାନ୍ସବର୍ଗରେ ଖେଳାଯାଉଛି। ଏହି ସିରିଜ୍ ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଚଳିତ ଚକ୍ରର ଅଂଶ। ମ୍ୟାଚ୍ରେ ବାଂଲାଦେଶ ପ୍ରଥମ ପାଳିରେ ୪୦୦ ରନ୍ କରିଥିଲା। ଏହାର ଜବାବରେ ଦକ୍ଷିଣ ଆଫ୍ରିକା ଚମତ୍କାର ବ୍ୟାଟିଂ କରି ୫୫୭ ରନ୍ର ବିଶାଳ ସ୍କୋର କରିବା ସହ ପ୍ରଥମ ପାଳି ଆଧାରରେ ଅଗ୍ରଣୀ ହାସଲ କରିଛି।
ଦକ୍ଷିଣ ଆଫ୍ରିକା ପକ୍ଷରୁ ରିୟାନ୍ ରିକେଲଟନ୍ ଶତକୀୟ ପାଳି ଖେଳିଥିବା ବେଳେ ମାର୍କେସ୍ ଏକରମ୍ୟାନ୍ ମଧ୍ୟ ଟେଷ୍ଟ କ୍ରିକେଟ୍ରେ ନିଜର ପ୍ରଥମ ଶତକ ହାସଲ କରିଛନ୍ତି। ଅନ୍ୟପକ୍ଷରେ ବାଂଲାଦେଶ ପକ୍ଷରୁ ହାସନ ମହମୁଦ ସବୁଠାରୁ ସଫଳ ବୋଲର ରହିଥିଲେ। ସେ ୪ଟି ୱିକେଟ୍ ନେଇଥିଲେ।
ଉଭୟ ଦଳ ମଧ୍ୟରେ ସିରିଜ୍ର ଦ୍ୱିତୀୟ ତଥା ଶେଷ ଟେଷ୍ଟ ନଭେମ୍ବର ୨୩ରୁ ୨୭ ତାରିଖ ପର୍ଯ୍ୟନ୍ତ ସେଂଚୁରିଅନ୍ରେ ଖେଳାଯିବ।
-------------------------
ହିନ୍ଦୁସ୍ଥାନ ସମାଚାର / ଗଗନ