ଜିଲ୍ଲାପାଳଙ୍କ ଅଧ୍ୟକ୍ଷତାରେ ରାଜନୈତିକ ଦଳଙ୍କ ବୈଠକ ଅନୁଷ୍ଠିତ

ଜୟପୁର, ୨୪ ଜୁନ୍(ହି.ସ.) – ସାର୍୍ କାର୍ଯ୍ୟକ୍ରମରେ କୋରାପୁଟ ଜିଲ୍ଲାରେ ୨୪ ଜୁନ୍ ୨୦୨୬ ସୁଦ୍ଧା ୯୯% ଗଣନା ଫର୍ମର ଡିଜିଟାଇଜେସନ୍ କାର୍ଯ୍ୟ ସମ୍ପୂର୍ଣ୍ଣ ହୋଇଛି। ଜିଲ୍ଲାରେ ମୋଟ ୯,୬୬,୪୨୪ ଜଣ ଭୋଟର ଅଛନ୍ତି ଏବଂ ଅବଶିଷ୍ଟ ୧% କାର୍ଯ୍ୟ ଗୋଟିଏ ଦିନ ମଧ୍ୟରେ ସମ୍ପୂର୍ଣ୍ଣ କରାଯିବ।

ଏହି ପରିପ୍ରେକ୍ଷୀରେ ଆଜି ଜିଲ୍ଲାପାଳ ଶ୍ରୀ ମନୋଜ ସତ୍ୟୱାନ ମହାଜନଙ୍କ ଅଧ୍ୟକ୍ଷତାରେ ଜିଲ୍ଲା କାର୍ଯ୍ୟାଳୟ ସମ୍ମିଳନୀ କକ୍ଷରେ ସ୍ୱୀକୃତିପ୍ରାପ୍ତ ରାଜନୈତିକ ଦଳର ପ୍ରତିନିଧିମାନଙ୍କ ସହ ଏକ ଗୁରୁତ୍ୱପୂର୍ଣ ବୈଠକ ଅନୁଷ୍ଠିତ ହୋଇଯାଇଛି।

ବୈଠକରେ ସୂଚନା ଦିଆଯାଇଛି ଯେ ମୋଟ ଫର୍ମ ମଧ୍ୟରୁ ୬.୨୪% ଫର୍ମ ଅସଂଗୃହୀତ ରହିଛି। ଏଥିରେ ଅନୁପସ୍ଥିତ, ସ୍ଥାୟୀ ଭାବେ ସ୍ଥାନାନ୍ତର, ମୃତ ଏବଂ ଡୁପ୍ଲିକେଟ୍ ଭୋଟରଙ୍କ ନାମ ସାମିଲ ରହିଛି। ଏହି ଅସଂଗୃହୀତ ଫର୍ମଗୁଡ଼ିକର ସତ୍ୟାସତ୍ୟ ଯାଂଚ ପାଇଁ ୨୬ ଜୁନ୍ ପୂର୍ବରୁ ସମସ୍ତ ବୁଥରେ ବିଏଲ୍ଓ-ବିଏଲ୍ଏ ବୈଠକ ଅନୁଷ୍ଠିତ ହେବ ବୋଲି ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି।

ଜିଲ୍ଲାପାଳ ସମସ୍ତ ରାଜନୈତିକ ଦଳଙ୍କୁ ବୈଠକରେ ସକ୍ରିୟ ଅଂଶଗ୍ରହଣ କରି ନିର୍ବାଚନ ତାଲିକାକୁ ତ୍ରୁଟିଶୂନ୍ୟ କରିବାରେ ସହଯୋଗ କରିବାକୁ ଅନୁରୋଧ କରିଛନ୍ତି। ଏହାସହ ୫ ଜୁଲାଇ ଠାରୁ ୪ ଅଗଷ୍ଟ ପର୍ଯ୍ୟନ୍ତ ନୂତନ ଭୋଟରମାନେ ଫର୍ମ ୬ ପୂରଣ କରି ନିଜକୁ ଭୋଟର ତାଲିକାରେ ଅନ୍ତର୍ଭୁକ୍ତ କରିପାରିବେ ଓ ଯେଉଁମାନେ କରିନାହାନ୍ତି ସେମାନେ ମଧ୍ୟ ଏହି ଅବୋଧି ମଧ୍ୟରେ କରିପାରିବେ।

ବୈଠକରେ ଅତିରିକ୍ତ ଜିଲ୍ଲାପାଳ ତପନ କୁମାର ନାଏକ ଏବଂ ଡେପୁଟି କଲେକ୍ଟର ମଙ୍ଗଳ ବାସ୍କେ ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ରାଧା ରାଣୀ ସରକାର ପ୍ରମୁଖ ଉପସ୍ଥିତ ଥିଲେ।

.......................................

ହିନ୍ଦୁସ୍ଥାନ ସମାଚାର / ପିକେପି